Fekk kritikk for å vera usakleg og unyansert

Politikarane tok seg god tid til å studera området då dei — ein del av dei for fyste gong — vitja Mælen under synfaringa onsdag. Dei stoppa fyrst ved kunstløypa for å få oversyn og vandra deretter i flokk og fylgje til fjøresteinane. Til sist venta ein powerpointpresentasjon i kulturgalleriet.

— Ja til anlegg, men med full reinsing

— Fantastisk område

Sentralt stod Sverre A. Stakkestad, som i både fråsegner og utspel i pressa har kritisert oppdrettsplanane. Han driv saman med Christel Øen hytteutleige gjennom Hardanger Fjordtun.

Han argumenterte for stille, ro og mørke på det veglause Samlaneset, og hevda at oppdrettsanlegga får store konsekvensar for det marine livet. Det er utsikta og naturen folk kjem for å sjå, sa han.

Han ottast støy og eit «diskotek» av blinkande lys i nærområdet, og minte om at også hyttefolk og fastbuande i området bidreg til å halda liv i lokalt næringsliv. I det store og heile er området både magisk, eventyrleg og fantastisk, hevda han.

— Dette er industri som vil øydeleggja området totalt, sa han.

Nabo Siv Mælen oppmoda om å ta vare på landemerket Mælen, Samlen og Samlaneset er. Ho planlegg å halda teaterkurs i Mælen.

— Det betyr utruleg mykje for meg og mine born at me ikkje øydelegg den heilt unike naturen her, sa ho.

Fleire lokale verksemder deltok på synfaringa. Charlotte Bergsholm frå Vassel Gard påpeikar at turistane kjem i hopetal fyrst og fremst for å sjå urørt natur.

På same dag

Naboane fekk kritikk av Tiril Eiken (Sp) for å servera ei frykteleg unyansert presentasjon med mange litt usaklege argument. Ho meiner dessutan at det er spesielt at saka vart handsama rett etter ei synfaring der berre éi side kom fram. I Kvam tillèt ein ikkje ein slik praksis i politikken.

Utvalsleiar Eivind Tokheim (V) påpeika at Eide Fjordbruk AS og to hyttenaboar tidlegare har fått presentera synspunkt i eit digitalt møte.

Eiken meiner naboane set oppdrettsnæringa opp mot andre næringar i området. Christel Øen meiner at det er å snu det på hovudet, og påpeika at det finst fleire etablerte verksemder i området. Eiken minte på si side om at det ikkje har vore nokon løyndom at området er sett av i kommuneplanen.

Mælen meiner det er viktig at det ikkje må verta næring mot næring.

— Eg er ikkje nødvendigvis mot oppdrett, men det må gå an å seia at kanskje me kan leggja det ein annan stad, samla det, tenkja annleis og bevara landemerket. Det er ikkje meininga å setja det opp mot einannan, sa ho.

— Inga betydning

Også kommunalsjef Kristian Bondhus-Jensen påpeika at akvakulturområdet er med i både kommuneplanen og kystsoneplanen. Øen sa at ingen visste om det og at ein vart fortald at oppdrett i området var lagt på is. Stakkestad sa at det aldri hadde vorte satsa på hytter om ein visste om det.

Eiken påpeika at sjølv om det ligg eit oppdrettsanlegg til dømes ved Hereiane, er området populært. Stakkestad sa at Hereiane etter hans syn er øydelagt, men at folk er ulike.

Han meiner at det er grunn til å spørja om demokratiet i Noreg fungerer om du er så uheldig at du får ei kraftline, ein motorveg, ei vindmølle eller eit oppdrettsanlegg midt i utsikta di.

— Du kan seia kva du vil. Me bur ikkje i Kviterussland. Eg blir ikkje fengsla eller skoten, men det får inga betydning. Politikarar i Noreg bryr seg berre om ein ting: pengar i kommunekassen frå ei søkkrik næring. Det er så blodig urettvist. Det er ein handfull menneske som tener seg søkkrike og øydelegg for turistnæringa og heile landskapet, sa Stakkestad.