Fekk konsesjon på bruk i Jondal

Utval for samfunn, plan og næring vedtok konsesjonen samrøystes 17. juni.

Vilkåra er at ein sameigekontrakt må avklara alle tilhøve som gjeld drift av eigedomen, at sameiga peikar ut ein person med ansvar for drifta, og at sameiga vert oppløyst dersom samarbeidet opphøyrer.

Eigedomen som søkjarane overtek ein del av, har eit bustadhus i Jondal sentrum og eit naust i Vikefjøra. Han er del av eit arveoppgjer. Eigedomen er på 155 dekar fordelte på 16 teigar, og vert nytta til fritidsføremål og skogbruk. Den største teigen går frå Hovløysehammaren mellom Jondal og Byrkjeland i retning mot Kjeglefurahaugen. I tillegg har eigedomen rettar i Jondalselvi og sameigeareal på Breisete med beite-, jakt og fiskerettar.

Konsesjon vert normalt ikkje gjeve dersom overtakinga inneber sameige eller fleire partar i ei sameige, av di det kan vera uheldig for landbruksdrifta. Rådmannen minner om at det er snakk om ei mindre utviding av ei sameige som har fungert godt lenge, og at eigedomen berre har litt jordbruksareal. Skogbruket på eigedomen har rett nok ikkje vore i samsvar med kravet om forynging, men med dei nemnde vilkåra vil drifta truleg verta god nok, meiner han.