Fekk kokkehjelp før festivaltida
Korleis lagar ein mat som vekkjer oppsikt på matfestivalar? Det fekk eit knippe lokale matprodusentar vita meir om på ein kreativ workshop på Hardangerfjord Hotel.
Workshopen gjekk av stabelen tysdag. Den vart leia av Christer Økland. Han er direktør for mat og drikke i Fjordtind Hotels AS, verksemda som driv hotellet i Øystese. Med seg hadde Økland kjøkkensjef på hotellet Mariusz Marzac og kokkelærling Malene Rogdaberg Trå. Dei gav gode råd til representantar frå Hardanger Bygdeysteri, Nøring og Breievne Gard.
— Når folk går på matfestivalar, får dei gjerne servert pølser eller hamburgarar som er lokalt forankra. Me ønskjer å inspirera produsentane til å servera noko meir spanande. Kvaliteten på produkta til desse småprodusentane er høg. Dette skuldast både at produkta er kortreiste og at me er tidleg i sesongen, seier Økland.
Økland fortel at Vestland fylkeskommune finansierer den kreative samlinga gjennom Matarena, ein interesseorganisasjon for småskalaprodusentar.
Årsaka til at workshopen vert arrangert no, er at sommaren er høgsesong for matmesser og marknader.
— Og ikkje minst er det no produkta til mange produsentar byrjar springa opp frå jorda. For kokkar er dette veldig gjevande. Me vert hyra inn for å arbeida med lokale produkt, som er det me likar aller best, seier Økland.
