Fekk katt i teina og «flygefisk» i båten
Om det er Karl Erik Berge eller fjøra nedom han som tiltrekkjer seg snodige opplevingar, er ikkje godt å seia.
«Katten sit i tunet når du kjem, skriv Olav H. Hauge, men ikkje alltid». Det skreiv Berge i eit innlegg på Facebook like etter nyttår. Berge er busett i Strandebarm, og på kort tid har han gjort fleire uvanlege funn i fjøra.
Maritim pus
I midten av desember var han ute og gjekk langs nabofjøra. Der stod det lagra nokre teiner, og jammen var det fangst i den eine. Ein svært uvanleg fangst òg.
— Ein katt hadde gått inn den eine luka og køyrt seg heilt fast. Det har truleg lukta godt inni der. Så der stod han, fortel Berge.
«Der ingen skulle tru at nokon kunne bu», som Berge skreiv i i Facebook-innlegget. Katten freste bra i teina, men såg ut som han var nøgd då han kom seg tilbake til fridomen, ifylgje redningsmannen.
Frå salt til ferskt vatn
Etter nyttår var Berge tilbake i fjøra, denne gongen for å ausa vatn or båten. Etter regntunge dagar var han omtrent halvfull av vatn. Og i vatnet sumde det ein fisk. Ikkje ein flygefisk, men ein sjøaure.
— Han har klart overgangen frå saltvatnet veldig bra, fortel Berge.
Fisken, som var rundt 500 gram tung, fekk leva vidare i det fri.
— Sjøauren her har det litt røft for tida, med mykje lus og diverse, men denne såg bra ut, seier Berge.
Båten ligg like ved utløpet av ein bekk. Berge fortel at området rundt bekken før i tida var ein god fiskeplass. Kanskje det framleis er det? I «gamle dagar» vart det sett garn der.
