Fekk ikkje gjera utanriks- til lokalpolitikk
R og SV fekk ikkje gjennomslag for ein lokalpolitisk protest mot framferda til Israel.
Årsaka er ikkje at ordførar er djupt usamd i det partia fremja i ein interpellasjon om saka til heradsstyremøtet 7. desember. Han er derimot usamd i at konflikten høyrer heime i lokalpolitikken.
– Utanrikspolitikk ligg til regjeringa, og internasjonale spørsmål bør etter mi meining løysast på nasjonalt nivå, i tråd med ansvarsdelinga mellom forvaltingsnivåa. Problemstillingar høyrer etter mitt syn heime i partiorgansisasjonane, og eg oppmodar om politisk arbeid gjennom desse, sa Næss.
Han påpeika at Noreg allereie har stemt i tråd med oppmodinga til SV og R i FN.
Geir Madsen (SV) viste til at mange kommunar har vedteke resolusjonar, og mana til lokalt engasjement og utløp for frustrasjon.
– Me veit at folk bryr seg. Det er ikkje berre oss her, sa Madsen.
– Eg er samd i alt lokalt engasjement er viktig, men som forvaltingsnivå bør ikkje eit heradsstyre vedta dette, sa Næss.
Saka kom ikkje på saklista, ettersom berre «einpersonpartia» R, SV, MDG, V og INP røysta for å ta henne opp.
