– Fekk ikkje gjennomslag
Onsdag vart det vedteke kva tilbod Vestland fylkeskommune skal lysa ut i den vidaregåande skulen komande skuleår.
I eit innspel til saka ytra rektor Arild Matland ved Kvam vidaregåande skule ynskje om ein halv klasse ekstra på VG1 og VG3 studiespesialiserande. Han skreiv at skulen er i sterk konkurranse med ein privat vidaregåande skule i nærområdet, og opplever at søkjarar som ynskjer å gå studiespesialiserande i den lokale, offentlege skulen, vert «tvinga» til å søkja privatskule av di det er kjent i lokalsamfunnet at Kvam vidaregåande skule har avgrensa med plassar.
Han presiserte òg at skulen har 11 elevar som tek VG2 studiespesialiserande i USA, som kjem tilbake til skulen, og at elevar ved andre skular i Kvam ynskjer seg til Kvam VGS for å ta VG3 studiespesialiserande.
Skulen vart ikkje høyrd.
Korkje Kvam eller Odda vidaregåande skule vart nemnd med endringar i innstillinga til fylkesdirektøren eller i det alternative forslaget frå Ap, Sp, SV, KrF, V, R og Bjarte Helland (uavhengig). Framlegget vart vedteke med 10 mot 5 røyster.
Som fylgje av fylkestinget sitt vedtak om heilskapleg tilbodsstruktur 1. oktober skal VG3 idrettsfag i Odda fasast ut frå 2025. VG1 bygg og anlegg og VG2 tømrar vert teke vekk frå 2028.
Ved Kvam vidaregåande skule vert tilboda VG2 helsearbeidar og VG2 barne- og ungdomsarbeidar lyste ut som to halve klassar, med til saman éin klasseressurs. Også VG2 industriteknologi og VG2 transport og logistikk vert lyste ut som to halve klasser med til saman éin klasseressurs frå hausten 2025.
Det er søkjartala som avgjer kva tilbod som vert sette i gang.
