– Fekk grunngjeving i sms
Då saka om den omstridde sentrumstomta i Jondal nyleg vart handsama, vart det vist til informasjon som var tilgjengeleg for korkje politikarar eller ålmenta.
I saksutgreiinga stod det at dagleg leiar i Tbm Maskin AS hadde hevda juridisk rett på tomta, etter vedtaket frå 2023, og grunngjeve den juridiske retten. Men det vart ikkje opplyst kvar denne informasjonen kom frå.
Fyrst då HF etterspurde grunnlaget for utsegna, fekk avisa tilsendt eit dokument på åtte sider. Dokumentet vart så lagt til i den politiske saka, men var ikkje ope for ålmenta. Sidan har dokumentet vorte tilgjengeleg for alle.
Skrivet er datert 9. september, og adressert til Ullensvang kommune og ordførar Roald Aga Haug. Sistnemnde fekk det tilsendt på sms, men Haug journalførte det ikkje.
Dokumentet rommar informasjon om kvifor verksemda hevdar å ha rett på tomta, kvifor verksemda gjekk konkurs og om handsaminga av saka i tidlegare Jondal kommune. Dagleg leiar i Tbm Maskin, Tarjei Vedå Vangdal, viser i skrivet til ein samtale.
Haug stadfestar at han var i kontakt med selskapet på telefon om kjøp av tomta.
– Det Vangdal lura på, var om ikkje dei hadde rett til å kjøpa tomta med tanke på vedtaket som vart gjort, seier ordføraren.
Han svara den daglege leiaren at om verksemdameiner å ha rett på tomta, må synspunktet underbyggjast skriftleg i brev til kommunen. Det vart altså gjort.
– Kva er grunnen til at politikarane fyrst fekk tilgang til brevet i saka etter at HF etterspurde det?
– Det kjenner eg ikkje til.
HF har ikkje fått innsyn i den juridiske vurderinga av saka frå Advokatfirmaet Rasmussen & Broch. Dokumentet låg ved den politiske saka, men er halde løynt for ålmenta. HF har klaga på avslaget.
