Flatabø grunneigarlag fekk i vinter klarsignal for å byggja ei bryggje på 22 meter med sju utliggjarar på Botnen i Kvam. Granne Vigdis Botnen Haugsvær klaga på vedtaket til lokalpolitikarane i Kvam, men Statsforvaltaren avviste klagen og godkjende anlegget ved gard nummer 64/1.
Haugsvær meinte at heradet hadde gjort sakshandsamingsfeil og at søknaden ikkje stetta krava til dispensasjon. Etter hennar syn krenkjer bryggja hennar strandrett på gard nummer 62/8, som fylgje av trafikken ved bryggja. Kvam herad kom til ein annan konklusjon og meinte at korkje retten til utfylling eller til tilflot vart råka, og fekk støtte av Statsforvaltaren.
Kommuneplanen opnar berre for regulering av bryggjer på inntil 12 rutemeter. Sjølv om bryggja på 55 rutemeter vert monaleg større, meiner Statsforvaltaren at landskapet ikkje vert så skadelidande at omsynet bak føringa vert sett til side. Han viser til at anlegget skal vera sams for tre gardsbruk med seks bueiningar, og at det ikkje vil råka tilgangen ålmenta har til strandsona. Bryggja vil forenkla transport utstyr og varer til gardsdrifta i eit område utan vegsamband. Trongen er såleis stor for båtplassar til både næringsdrivande og gjester, heiter det i vurderinga av klagen.
