Fekk draghjelp av sola
Straumutgiftene til Hardangerbadet er reduserte med 25 prosent. Årsak? Nye solcellepanel på taket.
Dagleg leiar i Hardangerbadet AS, Anita Storemark, fortel at arbeidet med å montera solcellepanela tok til tidleg i mai. Vanskar med å festa panela på ein forsvarleg måte gjorde at arbeidet tok meir tid enn venta. 14. juli var anlegget ferdig og i drift. Storemark presiserer at panela produserer straum til heile huset og ikkje berre til badeanlegget.
Ein firedel
På dei første to månadene har panela produsert om lag 37.000 kilowattimar med straum. Dette er om lag 25 prosent av straumforbruket til bygget.
– Dette skuldast sjølvsagt at det har vore sommar og lyse døger. I løpet av eit år reknar me med at anlegget vil produsera 150.000 kilowattimar. Det er om lag 15 prosent av det totale forbruket på 900.000 kilowattimar, fortel Storemark.
Kvam herad og Hardangerbadet Sameiget eig solcelleanlegget.
– Hardangerbadet AS er leigetakar i huset og er leigt inn til å driva og halda ved like anlegget, fortel Storemark.
Spleiselag
Solcelleanlegget kosta 2,3 millionar kroner. Prosjektet fekk eit investeringstilskot frå Enova på om lag 1,4 millionar. Dermed stod det 883.000 kroner att å betala for eigarane. Desse vart fordelte etter eigarbrøken: Kvam herad betalte 40 prosent, medan sameiga betalte 60 prosent.
Med ein gjennomsnittleg straumpris på éi krone per kilowattime kan anlegget ha tent inn kostnaden på mindre enn seks år. Panela er venta å ha ei levetid på om lag 30 år.
