Fekk det andre gode året på rad
Fjellstrand AS gjekk med overskot i 2022. Det betyr at verksemda har hatt to gode år etter ei lang rekke år med magre år.
Årsrapporten syner at verksemda i 2022 hadde driftsinntekter på 239,7 millionar kroner, driftskostnader på 226,8 millionar og eit driftsresultat på 12,9 millionar kroner. Driftsinntektene har auka med om lag 30 prosent samanlikna med 2021.
Dagleg leiar Hans Martin Gravdal fortel at hovudårsaka til dei gode tidene er oppdrag med ombygging av fartøy.
– Nybygg har det diverre vore dårleg med. Det har vore eit nybygg annakvart år dei siste åra. Det er for lite, seier han.
Fjellstrand har fått ein del medieomtale for arbeidet med den elektriske ferja MF «Ampere» og den elektriske hurtigbåten MS «Medstraum».
– MF «Ampere» har ikkje gjeve oss store inntekter. Det ser ut til at me har utvikla konseptet, medan andre byggjer ferjene. Etter at me laga MF «Ampere», er det bygd ei lang rekkje liknande ferjer i Tyrkia. Mange vel å byggja ute fordi det er nokre få kroner å spara. Det gjev ikkje mange skattekroner til Noreg, seier Gravdal.
Han trur Fjellstrand kjem til å byggja fleire elektriske hurtigbåtar.
– Men diverre trekkjer det ut i tid. Politikarane held talar om nullutslepp og elektrifisering, men det stoppar ofte der. Me jobbar med dette, men ingenting er i boks, seier Gravdal.
Gravdal er ikkje nøgd med første halvdel av 2023.
– Alle dei tilsette er i jobb, men me må ha meir å gjera om 2023 skal verta eit godt år. Me har ikkje hatt det me kallar kaijobbar, altså oppdrag der båtar ligg ved kaien vår, til no i år. Likevel er det vanskeleg å vita korleis året blir. Den første halvdelen av året har ikkje vore bra, men mykje kan skje i løpet av den siste halvdelen, seier han.
