Feira skeiv kjærleik

Veronica Guleng og Silje Louise Foldnes hadde komme til Kvam frå Bergen.

– Me tykkjer det er viktig å støtta opp under arrangement i bygdene. Me har høyrt at det har vore litt kritikk av Bygdapride. Difor tykkjer me det er fint å koma til Kvam for å støtta arrangementet, seier Foldnes.

Damene trur pridemarkeringar er ekstra viktige på små stader.

– Det er kanskje lettare å få utvikla konservative haldningar på små stader. Truleg er det vanskelegare å finna gode rollemodellar om ein er skeiv på bygda, seier Guleng.

– Ein vert i alle fall meir synleg i mengda om ein kjem ut som skeiv på bygda. I byen er det lettare å finna likesinna, seier Foldnes.

– Gjer meg stolt

Også Tone Størksen og Bjørg Vikås hadde kome frå Bergen for å marsjera.

– Me plar delta på pridemarkeringa i Bergen, men den gjekk me glipp av i år. For ei stund sidan såg me at det skulle vera Bygdapride, då tenkte me at me skulle delta. Eg voks sjølv opp i ei lita bygd. Der vert det ikkje arrangert Bygdapride, fortel Vikås.

Ho fortel at Bygdapride gjer henne stolt.

– For nokre år sidan gjekk det kanskje tjue personar i paraden i Bergen. No går hundrevis sjølv her i Kvam. Det å sjå masse glade folk som viftar med flagg, gjer meg stolt. Det viser at me som er skeive, har ryggrad.

Størksen trur Bygdapride kan vera med på å hindra folk i å flytta frå små stader.

– Historisk sett ser me at mange skeive har flytta frå småstader til storbyar for å sleppa å skilja seg ut. Arrangement som dette syner dei skeive at dei ikkje er åleine på bygda, seier ho.

– Burde vore sjølvsagt

Før paraden heldt rådmann Anita Hesthamar appell.

– På ein måte skulle eg ønskja at me ikkje trong ei slik markering. Det burde vore sjølvsagt at folk skal kunna leva saman i kjærleik, uavhengig av kjønnsidentitet og kjønnsuttrykk. Det burde vore sjølvsagt at dei som elskar kvarandre, ikkje skal verta utsette for hatytringar. Fleire hendingar både internasjonalt, nasjonalt og lokalt har synt at det ikkje er så sjølvsagt. Då treng me markeringar som Bygdapride for å visa at me set pris på mangfaldet, sa ho.

Paraden markerte slutten på ei veke som omfatta mellom anna føredrag, kino, utstilling og rundebordskonferanse, alt med Fargerikt Kvam i spissen.