Feira mangfaldet

Musikk, dans, matlukt og gode, gamle veggaviser fylte romma på Ålvik skule onsdag.

– Uno, dos, tres, cuatro, cinco ...

Gymsalen på Ålvik skule er dekorert med plakatar med informasjon om ulike nasjonar. USA, Filippinane, Peru og Nederland er mellom landa som er representerte på den internasjonale dagen.

I gangane luktar det av vårrullar og ris, kaffi og kaker. Både foreldre og besteforeldre har teke turen for å få innblikk i dei ulike kulturane som er representerte på skulen.

Etter matpausen står kviss og underhaldning på programmet. Skuleelevane og familiemedlemene får mellom anna høyra tradisjonell polsk og filippinsk musikk og presentasjonar av ulike land, og sjå ei framsyning av kampsportdansen capoeira, som vart utvikla av brasilianske slavar som ikkje fekk trena på å slåst, men fekk lov til å dansa.

– Kjekt å læra om andre land

Dagbjört Dis Palsdottir (9) synest det er kjekt med internasjonal dag.

– Det er kjekt å læra om andre land, seier ho.

Palsdottir er frå Island. Ho seier klassekameratane hennar er nysgjerrige på landet. Dei vil gjerne læra islandske ord og høyra om Island.

Dei har òg ei jente frå Filippinane i klassen.

– Eg trur me kan læra litt av kvarandre, seier ho.

– Er det noko spesielt ein gjer annleis på Island enn i Noreg?

– Me et middag klokka 18. Det er litt seinare enn folk pleier.

– Bygger aksept

– Det har vore ein veldig fin dag. Det er viktig å setja mangfald i eit positivt lys. Det vert det ikkje alltid gjort elles, seier Runar Hauso Froestad.

Han er kontaktlærar for første klasse på Ålvik skule. Mellom dei åtte elevane hans er sju ulike land representerte. Alle elevane har vakse opp i Noreg, men dei har foreldre frå mellom anna Bosnia, Polen, Nederland, Peru og Filippinane.

– Elevane som har utanlandske foreldre, kan gjerne spørja foreldra om ting frå andre kulturar, og har fine moglegheiter til å læra litt heime. Nokre av dei snakkar engelsk eller andre språk, seier Froestad.

Førsteklassingane presenterte dei ulike landa og demonstrerte kunnskap om både språk og hovudstader.

Han trur elevane lærer mykje av å arrangera ein slik dag.

– Det er fint å visa fram ulike kulturar og læra at ulikskap er bra. Eg trur det er med på å bygga aksept. Det er supert, seier han.