Feira fem år på skogen: — Har fått ei fantastisk mottaking

Nær to av dei fem åra i livet til Kvamskogen Landhandleri AS har vore prega av koronaviruset.

I desember 2016 opna butikken med mellom anna eit svært assortert ølutval på Kvamskogen. Laurdag feira femåringen den halvrunde dagen med utefest. Folk strøymde til og stilte seg i kø for å få servert kake, kaffi og gløgg av dagleg leiar Hilde Iren Ulland og kollegaene.

På parkeringsplassen spreidde fem musikarar frå Norheimsund Musikklag julestemning i — eller i det minste frå — blanke messingen.

Som om ikkje det var nok, var det fleire køar å stilla seg i. Den tredje og siste utgåva av Bondens marked i Kvam før jul vart avvikla utanfor butikken. Hardanger Bygdeysteri, Bjørnebruket, Heljetunet og fleire andre lokale aktørar falbaud mellom anna eple, kjøt, øl og ost.

Nær-døden-oppleving

Ove-Henning Bjørsvik, som er majoritetseigar i butikken, seier landhandelen har fått ei fantastisk mottaking av folk på Kvamskogen. Likevel var det på grensa til at koronaviruset tok knekken på verksemda då «hytteforbodet» la Kvamskogen aude våren 2020.

— Då trudde eg det skulle gå til helvete. Me hadde kjøpt inn varer for 600.000—700.000 og stod her med fulle lager, seier Bjørsvik.

Alternativ tenking måtte til. Ein del av løysinga, attåt ei kronerulling som hyttefolk sette i gang, vart å levera «koseposar» til påske som folk kunne koma innom og henta. I tillegg måtte permitteringar til for å landa på beina.

Året enda likevel godt, mellom anna av di folk ikkje kunne reisa utanlands i fjor sommar og haust. Dermed vart hytta berginga for mange.

I 2020 sette verksemda ny omsetningsrekord med 11,4 millionar kroner, mot om lag 9,6 millionar dei tre føregåande åra. Også årsresultatet i fjor, vel 0,4 millionar kroner, var det beste så langt.

2021 ser ikkje like bra ut, mellom anna på grunn av ein litt treg haust med dårleg vêr, men truleg bikkar butikken 10 millionar kroner i omsetning også i år, fortel Ulland.

Ho har i alt åtte kollegaer i heil- eller deltidsstillingar. Sjefen har vore med sidan starten, og seier det har vore kjekt å få vera med på å utvikla konseptet.

Tru mot konseptet

— Me kan ikkje klaga på Kvamskogen. Om ikkje me har hatt store overskot, har me hatt ein del år med pluss. For min del handlar det om å utvikla heile Kvamskogen, seier Bjørsvik.

— Kva har du lært av drifta?

— At ein skal vera tru mot konseptet ein har.

Bjørsvik poengterer at målet er å gjera butikken til like mykje ein møte- som ein handelsstad.

Han og familien eig fleire andre landhandlar, mellom anna på Evanger og i Herand. Ein butikk på Tysse vart lagd ned og flytta til Bellevuebakken i Bergen i fjor.

Mange med bind

Kvelden før jubileet kom meldinga om at Kvam er omfatta av ei regional forskrift som inneber mellom anna at folk må bruka munnbind om det ikkje er mogeleg å halda stor nok avstand til andre. Det viste att ved landhandelen, der dei fleste vaksne hadde dekt munnen til — i alle fall fram til kakestykket skulle fortærast.

Ifylgje Ulland førte ikkje forskrifta til så mykje ekstraarbeid, men festen vart altså avvikla ute. Dei tilsette oppmoda kundar som skulle inn i butikken om å venta utanfor dersom det var fleire enn åtte inne. Dessutan la dei ut munnbind og serverte sprit i rause porsjonar.

— Me har avventa og hadde nok gjort mykje meir ut av dette om ikkje ting hadde teke seg opp, seier Ulland.

Ho har registrert at bergensarane ser ut til å vera flinke til å nytta munnbind, og at dei har gjort det også i dagane før den regionale forskrifta kom fredag.