Feira donasjonar i bratt motbakke

850 tusenlappar, nærare bestemt, vart overrekte då Herand Idrettslag fredag inviterte pressa til markering i den gryande nyvinninga i stupbratte fjellsider på sørsida av Samlen.

Les også:

Som det sømer seg, stilte Bjørg Tolås med tung sekk fylt med kaker, konfekt og kaffi til den vesle horga som overvann akrofobien og testa dei fyrste par hundre trinna som sherpaene frå Nepal har bygt. Dei fem nepalarane takka ja til eit avbrekk i det steinharde arbeidet, og tok høfleg og lågmælt imot søtsakene og koffeinet dei vart tilbodne.

Cirka ein tredel på plass

Arbeidsdagen fredag var altså deira siste i denne omgangen. No har dei reist attende til heimlandet; sesongen for bygging av steintrapper i Noreg er på hell.

Sherpaene har fullført om lag ein tredel av trappene som idrettslaget ynskjer å få på plass. Den delen som er ferdig, er den brattaste og mest krevjande delen av traseen. I desse svingane bør kanskje endåtil pulsklokkefantastane roa seg og trø litt varsamt om dei verdset livet høgare enn ny rekord.

Christian Tolås og dei andre i arbeidsgruppa har lagt ned mykje arbeid i å peika ut den nye ruta. Dessutan er ein heil del skog rydda på dugnad. All flytting av steinar på fleire hundre kilo frå steinbrotet på Solesnes er overlate til Hardangerskifer AS, helikopter og dei røynde sherpaene.

Turstien har utgangspunkt på Kulturstien, og vona er å knyta denne og stien til Samlen saman til ein heilskap gjennom god skilting. Undervegs på vegen til topps er det fleire utsiktspunkt, noko som har vore ein viktig faktor i trasévala gjennom skogen.

Til dømes er stien lagd slik at dei som går, passerer fleire svært gamle graner med stor omkrins og høgd. Tolås har målt den eine til 35 meter. Ei mogelegheit er å tilby ei blanding av god folkehelse, ein attraksjon og informasjon om lokal kultur og historie.

Truleg framhald

Meir pengar til prosjektet fører etter alt å døma til at bygginga kan halda fram neste år. I alle fall har idrettslaget fått positive signal om at sherpaene truleg kan koma att då. Kronene set grensa, enkelt og greitt. Ein byggjer så langt ein kjem, fortel Reidun Haugen Dalseth arbeidsgruppa i idrettslaget som arbeider med prosjektet.

Den nye turvegen skal møta dagens sti til Samlen ved Fureskorane. Dalseth reknar ikkje med at vegen heilt til topps på det kjende turmålet vil verta steinsett – og meiner heller ikkje at det strengt tala er naudsynt. Men at nokre parti treng betre drenering, er sikkert.

– Me prioriterer fyrst dei delane der det er vanskeleg å koma fram, seier Dalseth.

– Dette hjelper veldig på. Fantastisk! seier Christian Tolås etter dei store pengeløyvingane.

Tolås har finstudert den valde traseen og laga ei liste over tiltak i parti der turgåarane kan trenga litt stødigare underlag. Desse er så rangerte. Sherpaene har kasta seg over dei tre høgast prioriterte. Fleire av dei skisserte tiltaka er mindre og krev berre ein stein eller tre for å letta framkoma.

Det som enno ikkje er avklara, er parkeringsløysinga ved Mælsvegen for dei som ikkje vil starta turen heilt nede i bygda. Vona er å få nytta eit område litt lenger aust. Naudløysinga er å leggja til rette eit mindre område like ved stien.

Til gagn for mange

Banksjef i Sparebanken Vest, May Turid Tømmervik, seier at banken har registrert at arbeidet er i gang og hatt lyst til å støtta prosjektet igjen. Ho understrekar at prosjektet er til gagn for både lokalsamfunnet, folkehelsa og turområdet. Også andre i regionen, til dømes kvemmingane, vil få glede av tiltaket, påpeikar ho.

– Me veit at mykje dugnad ligg bak slike engasjement, seier Tømmervik, som oppmodar idrettslaget om å søkja igjen neste år.

Også styreleiar Kjetil Widding i Sparebankstiftinga Hardanger skrytte av prosjektet, før han hosta opp like mykje som banken. Sveinung Selsvik, som sjølv har vore med på leggja til rette mellom anna turstiar for Jondal Idrettslag, fekk æra av å overrekkja ei gåve på 50.000 kroner frå idrettslaget. Han påpeika at også jondølingane får glede av tiltaket.

Mange stiller opp for bokstaveleg tala å byggja stein på stein. I tillegg til dei nemnde har trappa fått draghjelp av grunneigarfondet til Herand Kraft AS, eldsjelfondet til Sparebanken Vest, Mowi ASA, Olav Thon Stiftelsen, Vestglimt Idrettslag og Ullensvang kommune.

Les også: