– Feil av alvorleg karakter
Feilen ved ferjeleiet i Tørvikbygd fredag 13. september var eit fylkeskommunalt ansvar.
Det kjem fram i eit svar frå fylkesdirektøren til fylkesutvalet i Vestland fylkeskommune. Utvalsmedlem Bjarte Helland hadde stilt spørsmål om drifta ved ferjesambandet. Feilen var i eit kontrollskap med tilhøyrande straumutstyr, og var diverre alvorleg, skriv fylkesdirektøren. Eit straumpanel i huset på kaien kunne ikkje reparerast straks.
Feilen resulterte i redusert kapasitet i ein periode, og trafikantar vart oppmoda om å nytta strekninga Gjermundshamn–Årsnes i staden for å venta. Tilbakemeldinga frå reiarlaget er at denne oppmodinga hjelpte, skriv fylkesdirektøren.
MF «Lifjord» – også kalla «ferje 2» i sambandet Jondal–Tørvikbygd – vart sett i rute i sambandet Gjermundshamn–Årsnes for å hjelpa til med å få unna den ekstra trafikken.
– Slike hendingar vil stundom oppstå, og må handterast. Her opplever me at operatørane strekkjer seg langt for å få utbetra feil, skriv fylkesdirektøren.
