Fasaden er nesten ferdig

– Fasaden er 90–95 prosent ferdig. Han ser ut slik han skal vera. Det er slik me byggjer no, med ein miljøvenleg fasade som ikkje er behandla, seier Gunnar Hemre Ringheim, prosjektleiar i Vestland fylkeskommune.

Ringheim har sett materialane som er leverte, og seier det ser bra ut. Han seier at han ikkje er like nøgd med alle prosjekta fylkeskommunen har gjort tidlegare, men i Norheimsund er det valt tre av betre kvalitet enn i dei tidlegare skuleprosjekta.

– Det ideelle er at materialet grånar jamt og fint, men naturen vil jobba og det vert truleg litt ujamt med skjoldar og svertesopp, seier Ringheim.

– God kjensle

Ifylgje prosjektleiaren er mykje av arbeidet i høgda ute allereie gjort. Han fortel at anleggsleiar Murtaza Kazemi i Veidekke Entreprenør AS har planlagt godt for å unngå problem med snø denne vinteren. Inngangen i nord vert ikkje gjort ferdig endå, fordi det står ein byggjeplassheis der. Ringheim seier at arbeidet utan atterhald er i rute til å verta ferdig i oktober 2025.

– Eg har ei god magekjensle. Eg hadde ikkje det same inntrykket for eit år sidan i byggjetrinn ein, men det vart ferdig, det òg. Det er ei heilt anna ro over prosjektet no, seier han.

I bygningen der yrkesfagelevane skal flytta inn i slutten av januar, er det full fres, ifylgje Ringheim. Alle verkstadmaskiner er komne. Monteringa er i gang.

– Veidekke har bygd ei mellombels kantine til elevane, slik at elevane får alle fasilitetar i den tida som står att til resten er ferdig, seier Ringheim.

– Går framover

Det nye skulebygget har mange flater av tre. Det skal visa att at det er eit trebygg, seier Ringheim. Han fortel at det meste av det som skal målast innvendig, er ferdig, men også innandørs skal det vera fleire flater av tre.

I kinosalen står det framleis att ein del byggjearbeid. Skyveamfiet med stolar vil koma seint på plass, fordi alt anna må vera ferdig før det kan monterast, seier prosjektleiaren.

Utandørs skal anleggsgartnarane arbeida heile vinteren, om det lét seg gjera. Mellom anna skal dei laga murar mot Grovagjelet. Ringheim seier at han kryssar fingrane for at vinteren vert grei nok til at arbeidet kan gjennomførast.

Til dagleg er om lag sytti fagarbeidarar i sving på skuletomta.

– Det er endå eit langt løp til alt er ferdig, men det går jamt og trutt framover, seier Ringheim.