Fartsgrensesaka er avgjord: — Held på 80-sona
Det må i staden utførast fysiske tiltak på Kvamskogen, meiner Statens vegvesen.
Reaksjonane har ikkje late venta på seg i sosiale medium og kommentarfelt etter at det måndag vart kjent at fylkeskommunen ikkje får oppfylt ynsket om å setja fartsgrensa ned til 60 på store delar av Kvamskogen.
— Ut frå eit trafikktryggleiksperspektiv er det betre å samla avkøyrslene til ei felles avkøyrsle og sanera avkøyrsler til enkelthytter enn å setja ned fartsgrensa. Fysiske tiltak bør utførast i staden for å innføra fartsgrense 60 kilometer i timen, heiter det i konklusjonen til vegstellet.
Saka har godgjort seg i byråkratiet sidan framlegget om redusert fartsgrense var på høyring hausten 2019. Meiningane var delte. Dei folkevalde i Kvam bad om differensiert fartsgrense, slik at grensa kunne senkast i periodar med mindre trafikk.
Falsk tryggleik
I avgjerda vert det lagt vekt på at strekkja har få fastbuande og dermed få mjuke trafikantar på vekedagar.
— Å setja ned fartsgrensa på grunn av tilrettelegging for gåande og syklande når det ikkje er mange gåande og syklande langs vegen, vil ikkje føra til respekt for fartsgrensa. Snarare kan nedsett fartsgrense føra til falsk tryggleik for dei gåande, skriv Statens vegvesen.
Det er ikkje rom for å klaga på avgjerda, som dermed er endeleg.
Berre harde skadde
Vegstellet viser til at det i perioden 2009—2019 vart registrert 13 ulukker med personskade på den 8,8 kilometer lange strekkja. Ingen omkom og ingen av dei skadde var mjuke trafikantar.
Vegvesenet skriv i saksutgreiinga at strekkjer med 60-grense bør vera enkle å kjenna att på grunn av busetnad, avkøyrsler og lokal aktivitet. Vegvesenet er usamd med fylkeskommunen i oppteljinga av kryss og avkøyrsler på Kvamskogen.
Mange avkøyrsler har dårleg sikt på grunn av vegetasjon. Dei ansvarlege bør syta for god sikt, meiner Statens vegvesen.
