— Farleg kryss ved Lingavikane

Det er konklusjonen frå eigaren av fylkesveg 576, Vestland fylkeskommune, etter ei synfaring ved den umerkte avkøyrsla 3. september. Fylkeskommunen, politiet og grunneigar Tormod Linga tok del i synfaringa etter at det var kome fleire uromeldingar frå leigetakarar på plassen.

Det kom fram at avkøyrsla har avgrensa sikt mot sør. Sikta mot nord er noko betre.

Husvognplassen ligg mellom Hjartnes og Linga.

Vil sjå effekten

Leigetakarane ynskjer at det vert sett opp skilt som gjer merksam på den farlege avkøyrsla. Men Vestland fylkeskommune ynskjer ikkje å setja opp skilt om «annan fare» før ein har sett effekten av ryddinga. Dette er òg i tråd med krava i handbøkene om vurdering av fysiske endringar før skilting, skriv fylkeskommunen i eit brev til Linga.

Fareskilt rettar seg mot køyrande trafikk og vert nytta når ein fare er vanskeleg å oppfatta i tide av køyrande som ferdast med naudsynt aktsemd, skriv fylket. Skilt kan òg setjast opp når ein fare er vesentleg større enn det som kan forventast ut frå trafikktilhøve, vegutforming og omgjevnader. Før fareskilt vert sette opp skal det vurderast om fysiske endringar eller andre tiltak kan ta bort eller redusera faremomentet.

— Vår erfaring med bruk av fareskilt er at desse i liten grad vert respekterte av trafikantane. Avkøyrsla er plassert slik at det er tilstrekkeleg tid til å oppfatta henne med naudsynt aktsemd, og gjev såleis ikkje grunnlag for oppsetjing av skilt, skriv fylkeskommunen.

Viktigast av alt er at brukarane må gje teikn og plassera seg rett i god tid når dei svingar av frå fylkesvegen, påpeikar fylket.

Det er heller lite trafikk på strekkja, nærare bestemt kring 750 køyretøy i døgeret. Vegbreidda er sju meter og fartsgrensa 80 kilometer i timen.

Høg fart

Fleire leigetakarar har opplyst at dei er redde for å verta påkøyrde når dei svingar av frå fylkesvegen og ned til campingplassen. Det er vist til fleire nestenulukker og ein påkøyrsel.

Som avbøtande tiltak har brukarane av plassen føreslege redusert fartsgrense, skilting av farleg kryss og skilting til campingplassen.

Det er ikkje grunnlag for å endra fartsgrensa, skriv fylkeskommunen. Det er heller ikkje lovheimel for å skilta «farleg kryss». Eit visingsskilt som varslar campingplass, vil truleg ikkje ha nokon effekt på eventuelle trafikkulukker, skriv fylket.

Bekymrar seg

Simon Ravn er leigetakar og ein av dei som er uroa. Avkøyrsla er plassert på ei rett strekkje der det ofte er trafikkfarlege situasjonar, hevdar han. Trafikantar føretek livsfarlege forbikøyringar medan bilen framfor blinkar til venstre og skal køyra av fylkesvegen, skriv Ravn i eit straumbrev til Statens vegvesen.

Seinast i veke 30 var det ei stygg påkøyrsle i dette krysset som enda med personskade, opplyser Ravn.

Han meiner det som eit minimum bør setjast opp eit fareskilt om farleg kryss og forbikøyring forbode på strekkja før avkøyrsla, i retning Strandebarm. Avkøyrsla bør òg merkjast med informasjonsskilt, meiner Ravn.

— Med hjartet i halsen

Christel Ravn, som har nytta «den nydelege ferieplassen» i tre år, er også uroa.

— No nyleg var det diverre ikkje noka nestenulukke lenger, og ulukka var eit faktum, skriv Ravn til vegvesenet.

— Me sit ofte med hjartet i halsen, då mange verkeleg gjev gass på strekkja. No held plasseigaren på med å utvida plassen, slik at fleire kan få nyta denne nydelege staden. Det betyr at fleire bilar skal inn og ut frå plassen. Kan nokon sjå på skiltinga på denne strekkja? skriv Ravn.

— Kjenner det i magen

Også Vivian Bjørnset Johansen held stundom til på Lingavikane Husvognplass.

— Me har hatt to opplevingar som eg kjenner sit godt i magen og som gjer meg kvidefull for å køyra inn til campinga, skriv Johansen til vegvesenet.

Avkøyrsla høyrer ikkje saman med ei strekkje med 80 kilometer i timen, meiner ho.

Eigarane er lite villige til å ta opp skilting, då forbipasserande kan tru at det er utleige eller parkering på plassen, hevdar Johansen. Ho spør seg om dette burde vore vurdert.

Alle tre meldingane vart sende vidare til Vestland fylkeskommune.

— Eit hendeleg uhell

HF spør innehavar av husvognplassen, Tormod Linga, om han har nokon kommentar til at avkøyrsla har vorte kalla farleg.

— Farleg og farleg. Me har hatt synfaring, og konklusjonen var at folk må vera litt meir forsiktige. Det er ikkje noko problem.

— Kjem du til å rydda ved avkøyrsla?

— Ja, det skal me fiksa. Me skal rydda hogga litt skog for å gjera avkøyrsla meir synleg.

— Det var ei påkøyrsle der for ikkje lenge sidan?

— Ja, men det var berre ei lita hending. Båe bilane køyrde derifrå etterpå. Det var ein som stua handa, elles var det ikkje nokon ting. Det som skjedde, var at to bilar kom frå norheimsundsida. Den fremste sjåføren skulle svinga ned, sette på blinklyset og la seg over, og så ville den andre sjåføren køyra forbi. Han såg blinklyset, men tenkte litt feil. Han har fått ei bot som han har godteke, seier Linga.

— Me vart kalla inn til synfaring med politiet og fylkeskommunen. Leigetakarane var òg innkalla, men ingen møtte. Eg er litt skuffa over det, seier Linga.

Han har 109 leigetakarar og har drive campingplassen i 34 år. Det har ikkje hendt noko slikt før, opplyser han.

— Alt ordnar seg. Det er ingen vits i å setja ned farten. Dette var eit hendeleg uhell, seier Linga.