Fare for skred – nysnø og vind skaper skumle forhold i Sør-Noreg til helga
Varsom.no åtvarar om at snøen som no lavar ned, skapar skumle forhold i Sør-Noreg til helga. Skred kan losne av seg sjølv eller bli utløyst av skiløparar.
Allereie fredag er det varsla snøskredfare grad 3 i ti av dei 24 regionane som blir omfatta av skredvarslinga på Varsom.no. Desse ti regionane ligg alle i Sør-Noreg.
– I helga er det venta at det stadvis kan vere svært lett for skiløparar å løyse ut snøskred, og det kan løyse snøskred av seg sjølv etter kvart som det snør og blæs endå meir, skriv Varsom.no.
Artikkelen held fram under annonsen.
Ifylgje yr.no skal blåsa med vindstyrke opp mot 16 meter i sekundet i Norheimsund, og opp mot 20 meter i sekundet mellom anna i Ålvik og Strandebarm. På Oma kan vindstyrken koma opp i 23 i kasta, medan Jondal kan venta vindkast på 28 meter i sekundet.
Snøkarta i Senorge.no viser at dette er ein av dei 4–5 mest snøfattige vintrane i fjellet på Austlandet. Når nysnøen kjem med mykje vind, aukar snøskredfaren i Sør-Noreg.
Kraftig vind og nysnø vil danne svært ustabile flak i heng som ligg i le for vinden. Det vil vere svært lett for skiløparar å løyse ut skred i den ferske fokksnøen.
– Når vi får meir snø og vind på eit snødekke som allereie er kjenslevart, aukar snøskredfaren, seier vaktleiar i snøskredvarslinga Gustav Pless i pressemeldinga.
Rådet hans er å styre unna skredterreng og terrengfeller og sjekke oppdaterte snøskredvarsel.
(©NPK)
