Får vel 7 millionar kroner

Regjeringa føreslår nemleg å auka overføringa til havbruksfondet med om lag 900 millionar kroner. Det går fram av ei pressemelding frå Nærings- og fiskeridepartementet.

Regjeringa ynskjer å dela ut i alt 1,4 milliardar kroner til kommunar og fylkeskommunar som legg til rette for oppdrettsverksemd.

Heradet får, ifylgje framlegget, 6,2 millionar kroner i ordinær utbetaling i tillegg til dei ferske pengane, i alt 7,2 millionar kroner. Ullensvang kommune får om lag 4,8 millionar kroner i ordinær utbetaling.

Pengane skal fordelast med 87,5 prosent til kommunane og 12,5 prosent til fylkeskommunane. Ein del av kommunane sin del går til kommunar som har klarert ny maksimal tillaten biomasse (MTB) dei siste to åra. Vestland fylkeskommune får tildelt 37,3 millionar kroner.

– Kommunar som legg til rette for næringsverksemd, skal kompenserast for dette, seier fiskeri- og havminister Cecilie Myrseth (Ap).

– Med regjeringa sitt grep vert ein monaleg del av verdiskapinga som skjer i havbruksnæringa, verande i lokalsamfunna, seier ho.

Havbruksfondet får tildelt pengar gjennom produksjonsavgifta for havbruk og ved sal av ny kapasitet til oppdrett. Fondet har fått ekstrainntekter gjennom auksjon av oppdrettsløyve og ved at produksjonsavgifta vart høgare enn budsjettert.

Etter framlegget vil 142 kommunar og 7 fylkeskommunar få stønad. Stortinget skal handsama framlegget frå regjeringa, og Fiskeridirektoratet tek sikte på å betala ut pengane i løpet av året.