Får ti millionar meir enn venta
Kvam herad og andre kommunar får ein større del av kaka frå oppdrettsnæringa i år. Ordførar Torgeir Næss (Ap) reknar med at det vil gje utslag i neste års budsjett.
Kvart år stiller norske kommunar store hav- og fjordområde til disposisjon for oppdrettsverksemd. Som kompensasjon får desse kommunane utbetalt pengar frå det såkalla havbruksfondet.
I år blei det sett ny rekord i utbetaling. Kvam herad får 22,6 millionar kroner. Heradet hadde budsjettert med 12 millionar. Ordførar Torgeir Næss (Ap) er godt nøgd.
– Her er det grunn til å skryta av regjeringa. Den har sagt at kommunar skal få meir igjen, og det gjer me no, seier han.
Han meiner likevel også at det berre er rett og rimeleg.
– Me, og andre kommunar, har fått for lite før. Det skal jo vere ein kompensasjon for ulempene som verksemda fører med seg.
Ordføraren nemner ureining og negative konsekvensar for fiske som døme.
Ullensvang kommune på si side får utbetalt 17 millionar frå fondet. Ifølgje regjeringa kan pengane utbetalast allereie i oktober.
Ventar kutt på 40–50 millionar
Næss seier at ekstra inntekter vil kunna komma godt med når neste års budsjett for heradet skal produserast.
– Me, som så mange andre, er i ein krevjande situasjon. Eg forventar at rådmannen føreslår kutt på 40–50 millionar i neste års budsjett.
Han håper og ventar at rådmannen tek desse ti ekstra millionane med i reknestykket når administrasjonen legg fram sitt forslag i november, og at dei kan hjelpe til med å letta noko på kuttforslaga.
Rekordutbetaling
– Me har heile tida sagt at me skal sørgja for at kommunane langs kysten skal sitta med meir igjen av fortenesta når dei stiller naturressursane til disposisjon, seier finansminister Trygve Slagsvold Vedum (Sp) i ei pressemelding frå regjeringa.
Havbruksfondet har delt ut utbetalingar sidan 2015. I 2022 vedtok Stortinget å auka delen av inntektene som går til fondet. Dermed går også meir til kommunane.
Årets rekordutbetaling skuldast høge prisar på auksjon av oppdrettsløyve, i tillegg til den auka delen til fondet, ifølgje fiskeri- og havminister Marianne Sivertsen Næss (Ap).
