Grågåsa kom tidleg til Oma i år. Ein flokk på fleire enn 100 fuglar gjer skade på innmarka til Nils Erlend Oma Rognehaug frå Omastrand. Gåsa beiter på gras som har byrja veksa, og fører til dårlegare avlingar og ureina fôr. Fugleskremsel har ikkje hatt nokon effekt.
Difor har Rognehaug søkt om og fått løyve frå Kvam herad til såkalla skadefelling av to–tre gjæser. Håpet er at døde fuglar på bakken skal skremma andre gjæser vekk.
Løyvet gjeld frå 20. mars til 25. april. Alt vilt er freda i yngletida, og grågåsa startar hekkinga i slutten av april.
Rådmannen grunngjev vedtaket med at flokkane med grågås vert stadig større og er eit aukande problem i Kvam. Ho skriv også at grågåsbestanden i Kvam er både stor og levedyktig. Fellingsløyvet gjeld ein kort periode og vil ikkje påverka hekkinga, slik ho oppfattar det.
