Får meir frå fond

Kvam herad får 22,6 millionar og Ullensvang kommune 17,4 millionar kroner frå havbruksfondet i år.

Det går fram av ei pressemelding frå Nærings- og fiskeridepartementet og Finansdepartementet 21. oktober.

Året før stortingsvalet vert det delt ut nær 4,7 milliardar kroner til 143 kommunar og 8 fylkeskommunar med oppdrettsverksemd. Utbetalinga er den største sidan fondet vart oppretta. Årsakene til det er høge prisar og «grepene regjeringen har tatt for å sørge for at vertskommunene skal sitte igjen med en større andel av verdiskapingen fra oppdrettsnæringen», skryter fiskeri- og havminister Marianne Sivertsen Næss (Ap) i meldinga.

Pengane i fondet stammar frå sal av løyvekapasitet til oppdrettarar og produksjonsavgifta på oppdrett. Kommunane får 20 prosent og fylkeskommunane 80 prosent av pengane.

Pengane vert utbetala snarast mogeleg, truleg denne månaden, opplyser departementet.