Får lagra merdar ved Horggjona
Lingalaks AS får lagra ymse oppdrettsutstyr ved Horggjona, men berre fram til kommuneplanen skal rullerast. Fleirtalet meiner at alternativa er dårlege.
Berre Ap og MDG streta imot då planutvalet tysdag 20. september velsigna oppdrettsselskapet med den naudsynte dispensasjonen. I bresjen for velviljen gjekk Ottar Randa (H).
Ser ikkje ulemper
Etter hans syn er det føremålstenleg å halda fram lagringa i området, som har gått føre seg i ni år utan formell avklaring. Grunngjevinga er at kommuneplanen manglar tenlege område. Tiltaket er korkje skjemmande eller inngripande, og det svekkjer heller ikkje allmenne interesser i strandsona, meiner han og fleirtalet.
Randa viste i møtet til at ein har opna for ymse mellomlager på land, til dømes på Evjo i Øystese. Han sa at han ikkje har vore merksam på at oppdrettarar treng lagerplass i sjøen.
Silje Aksnes (Sp) understreka at tidsavgrensinga er viktig. I mellomtida må Lingalaks arbeida for å skaffa alternative lagerlokalitetar eller metodar, meiner ho.
– Det er viktig at Lingalaks sjølv har fokus på ikkje å lagra utrangerte ting, sa ho.
Aksnes åtvara mot å laga til ein «roteplass» og mana til å ta omsyn til grannane.
– Fersk plan
Even Øyri (Ap) meiner ein bør retta seg etter den relativt ferske kommuneplanen frå 2019. Han viste til at ein den gongen utvida akvakulturlokalitetar for å ha større plass til å utvida og justera.
– Me hadde håpa at planen og lokalitetane var tilstrekkelege, sa han.
Kari Mostad (MDG) viste til at lokaliteten vart teken ut or planen som fylgje av påviste korallar. Svein J. Stuve sa at eit anlegg som ikkje er i drift, ikkje har mykje å seia for korallane. Skal ein lagra ved andre lokalitetar, vil det ta stor plass. Lagring på land vil øydeleggja utstyret, påpeika han.
Gunnar Kvandal (Frp) meiner utstyret vil vera minimalt til sjenanse i Horggjona. Dessutan vil det liggja midt i «arbeidsområdet» til oppdrettaren og ikkje i ein utkant. Slik sett er plasseringa fornuftig med tanke på miljøet, fordi ein reduserer omfanget av transport, påpeika han.
Rådmannen tilrådde å avslå søknaden, mellom anna av di Statsforvaltaren og andre sektorstyresmakter har uttala seg negativt om tiltaket. Dei har høve til å klaga på vedtaket.
