Får ikkje skilta til bubilar

Torsnes Næringseigedom AS har søkt Vestland fylkeskommune om å få setja opp to skilt som viser veg bubilparkeringa på Torsnes i Jondal. Målet er å gjera avkøyrsla tydeleg med skilt med svarte bokstavar på kvit bakgrunn.

Fylkeskommunen har avslege søknaden. Han skriv at han har ei svært restriktiv haldning til reklame langs vegane. Grunngjevinga er at reklamen kan vera farleg fordi han trekkjer stor merksemd bort frå trafikkbiletet. Dessutan kan private skild skipla sikta i avkøyrsla.

– Bubilparkeringa har nye skilt med varsel i båe retningar og skilting i sjølve avkøyrsla, og me ser på dette som tilstrekkeleg til at ukjende finn fram til parkeringa. Avkøyrsla og skilta har god sikt i båe retningar og er godt synlege for vegfarande, heiter det i avslagsbrevet.

Hardanger Bobilparkering ligg på steintippen ved utløpet av Jondalstunnelen. Her er 28 plassar med straum, vatn og høve til å tømma spillvatn og kloakk, ifylgje nettstaden til parkeringa.