Får ikkje oppdrettsanlegg ved Mælen
Nær tre år tok det Mattilsynet å ta avgjerda som inneber at Eide Fjordbruk AS ikkje får ala opp laksar ved Mælen.
Det var i januar 2022 eit advokatfirma på vegner av oppdrettaren klaga på vedtaket til tilsynet om å avslå søknaden om å få lokaliteten i Herand godkjend. Regionkontoret avviste klagen og sende han vidare til klagesakseininga i tilsynet.
To kilometer
8. november i år kom avgjerda, som altså var av det negative slaget sett med augo til klagaren. Dimed har Vestland fylkeskommune avslege søknaden om å ta lokaliteten i bruk til eit såkalla semilukka anlegg med ein produksjon på inntil 3.600 tonn.
Utan aksept frå Mattilsynet vil slik bruk nemleg vera i strid med laksetildelingsforskrifta. Det hjelper ikkje at området er sett av til akvakultur i kommuneplanen for Jondal.
Ein viktig faktor i det fyrste avslaget på søknaden var at tilsynet meinte at risikoen for smittespreiing var for stor i området, som fylgje av nærleiken til setjefiskanlegget til Mowi i Herand.
Klagesakseininga er samd med Eide Fjordbruk i at semilukka merdar med djuptliggjande vassinntak og avløp kan gje betre helse og velferd for fiskane, som fylgje av mindre risiko for lakselus. Spørsmålet er om smitterisikoen vert låg nok når fråstanden til setjefiskanlegget er berre to kilometer, meiner tilsynet.
– Uakseptabelt
– Slik klagesakseininga ser det, vil anlegget ha betydeleg lågare sannsyn for å få lakselus inn i anlegget samanlikna med eit ope merdanlegg. Sannsynet for å få inn virussjukdomar som ILA og PD vil også bli lågare, men langt frå så vesentleg lågare som for lakselus. Samtidig vil punktutsleppet av avløpsvatnet frå anlegget kunna innehalda større mengder smittestoff ved eit sjukdomsutbrot. Etter vår vurdering vil akvakulturanlegget innebera uakseptabel risiko for spreiing av sjukdom til setjefiskanlegget, heiter det i avgjerda.
I klagen viste oppdrettaren mellom anna til at utslepp på 60 meters djupne ikkje vil påverka nærliggjande anlegg, og til at utslepp ved Mælen i hovudsak vil vert ført bort frå setjefiskanlegget.
Hovudregelen til Mattilsynet er eit krav om ein avstand på minst fem kilometer mellom to akvakulturanlegg.
Då søknaden var på høyring i 2021, kom 15 merknader. Dei fleste som uttala seg, var skeptiske. I Ullensvang kommune stilte eit knapt fleirtal seg positiv til søknaden, men fleirtalet kravde samstundes «full reinsing og null utslepp av lusegift, fôr/pellets og fiskeavføring til sjø ved nyetablering av oppdrettsanlegg i Ullensvang».
Les også:
