Får ikkje hjelp til klimavenlege innkjøp
Miljødirektoratet har avslege ein søknad frå Kvam herad om stønad til eit treårig prosjekt som skal fremja «klimavenlege anskaffingar».
Direktoratet meiner at prosjektet i Kvam har for liten effekt og at søknaden om 1,47 millionar kroner seier for lite om konkrete innkjøp som er aktuelle. Det som er nemnt i søknaden, er at heradet ynskjer å stilla miljøkrav i prosjektet Øystese skule og nye rammeavtalar for asfaltering.
Ifylge søknaden skal klima og miljø no få 30 prosent vekt i offentlege innkjøp. Målet er å stetta kravet, men for å oppnå det, er heradet avhengig av økonomisk stønad, ifylgje rådmannen.
– Kapasiteten og kompetansen er ikkje tilstrekkeleg til å møta utfordringane og krava knytte til effektiv integrering av klima- og miljøomsyn i våre innkjøpsprosessar, heiter det i den avslegne søknaden.
Planen var at ein byggjeleiar i 40 prosent stilling, ein prosjektleiar i 20 prosent stilling og ein miljøkoordinator i 20 prosent stilling skulle arbeida med klimakrav i innkjøp. Det samla budsjettet over tre år var på 2,94 millionar kroner.
