Får ikkje gangfelt ved barnehage

I slutten av mai 2023 sende styrar i Norheimsund barnehage, Karin Træbakken, eit brev til heradet. Ho skildra utrygge situasjonar der born og vaksne nytta fartshumpane når dei kryssa vegen. Humpane er rett merkte, men borna tolkar merkinga som fotgjengarfelt, skriv ho.

Træbakken opplyste at barnehageborna får opplæring i trafikktryggleik og lærer å nytta gangfelt til å kryssa vegen. Ho skreiv at eit gangfelt hadde gjort området tryggare for gåande og syklistar, og hadde gjort det lettare for barnehagen å læra opp borna. Ho spurde kva som må til for å få gangfelt.

I september i fjor sende barnehagestyraren purring til heradet og minte byråkratane på den nær halvtanna år gamle e-posten.