Får hjelp til å utvikla Ålvik

Pengane kjem frå «Livoglyst» i Vestland fylkeskommune, eit program for innbyggjarar som vil skapa engasjement, trivsel og aktivitet i lokalsamfunna sine. Programmet gjev kompetanse innan utvikling av lokalsamfunn og økonomisk stønad til mobilisering og aktivitetar. Innbyggjarane får gjennom programmet moglegheit til å utvikla heimstaden sin.

Ålvik Idrettslag har sendt søknaden for prosjektgruppa som vil snu trenden med dalande innbyggjartal og elevtal. Målet med prosjektet er å auka lysta til å bu og busetja seg i bygda, heiter det i søknaden. Gruppa ynskjer at Ålvik skal ha nok innbyggjarar til å tryggja barnehage, skule, pensjonistbustader, legekontor og butikk, og ha eit triveleg bygdemiljø.

– Paraplyen me manglar

Gruppa som har drege i gang prosjektet, består av leiarane i dei fleste frivillige organisasjonane i bygda, seier Camilla Gangdal. Ho er leiar i Ålvik Idrettslag. I tillegg til idrettslaget er musikklaget, grendeutvalet, arbeidsstova, Folkets Hus, kor og Raudekrossen med.

I prosjektstyret sit Gangdal, Mette Hereid Aalvik, Tommy Vikdal, Elma Montoya, Eili Hovland og Martine Vik Byrkjeland. Dei skildrar seg sjølve som personar i alderen 20–50 år som er småbarnsforeldre, foreldre til unge vaksne som potensielt kan flytta tilbake, personar som vaks opp i Ålvik og tilflyttarar.

Gangdal seier at leiarane diskuterte om «Livoglyst» var noko for Ålvik. Etter å ha delteke på eit webinar som fylkeskommunen arrangerte, vart dei meir gira, og sende inn ein søknad. Ein månad seinare, i haust, fekk gruppa svar om at ho er tildelt eit av 11 nye forprosjekt. Ifylgje Gangdal er ikkje pengane viktigast, men den faglege hjelpa gruppa kan få i nettverket rundt «Livoglyst.

– Det er paraplyen me manglar. Enkelte ting høyrer ikkje inn under til dømes musikklaget eller Folkets hus, men går meir på samfunnet generelt, seier Gangdal.

Skal prioritera i folkemøte

Gangdal fortel at gruppa skal kartleggja korleis situasjonen er, kva som er problemet og korleis ein skal nå målet.

Ifylgje søknaden skal det i eit folkemøte diskuterast kva tiltak som skal prioriterast og rekkefølgja på dei, slik at alle dreg i same retning. Søknaden nemner fylgjande problemstillingar som aktuelle:

• Korleis sikra at attraktive bustader er tilgjengelege for dei som vil flytta til Ålvik?

• Korleis informera på ein freistande måte om tilboda som finst?

• Korleis få dei som har vakse opp i Ålvik, til å busetja seg der?

Forprosjektet har fått lovnad om 80.000 kroner frå fylkeskommunen. I søknaden er det skissert at 10.000 kroner skal gå til prosjektleiing og 10.000 til utgifter i samband med deltaking i «Livoglyst»-nettverket. Dei resterande 60.000 kronene skal gå til mobiliseringstiltak og aktivitetar. I søknaden står det at gruppa ikkje veit kva forprosjektet vil bringa, fordi fleire skal vera med.

Skal kartleggja bustader

Gangdal seier prosjektet skal sjå på korleis ein skal halda på dei som allereie bur i Ålvik, og korleis ein skal få nye til å flytta til bygda. Difor vil gruppa fokusera på kva bumoglegheiter som finst og kva innbyggjarane eigentleg treng for å verta buande. Ho seier gruppa skal kartleggja kva bustader som er tilgjengelege.

– Mange hus står tomme i store delar av året fordi mange brukar dei som fritidshus. Dei er ikkje tilgjengelege og heller ikkje til sals. Me har byrja kartleggja desse. Kanskje me kan finna ut kva som må til for at eigarane skal bu der fast, seier Gangdal.

Ho seier at marknadsføringa av bygda må bli betre. Ho ser føre seg at reklamen for Ålvik skal vera lekker og freistande.

– Om ein googlar Ålvik, ser det ut som Ålvik berre er ein fabrikk, men bygda er så mykje meir enn det. Me treng informasjonsmateriale me kan visa fram og vera stolte av, seier Gangdal.

Kan bli hovudprosjekt

Idrettslagsleiaren seier at dei har det meste som trengst i Ålvik. Her kan ein finna arbeidsplassar, og har kort veg til kommunale tilbod som barnehage, skule og legesenter, påpeikar Gangdal. Ålvik har fin natur med god tilkomst til både fjorden og fjellturar. I tillegg er det mange fritidstilbod i forhold til talet på innbyggjarar, til dømes bading, kor, skulemusikk og bingo. Innbyggjarane er engasjerte, seier ho.

9. januar hadde prosjektgruppa sitt fyrste møte med fylkeskommunen for å få meir informasjon om prosjektet kan gjennomførast og bygda inkluderast. Gangdal ynskjer at behovet skal kartleggjast grundig før tiltaka vert bestemte.

Ifylgje fylkeskommunen må prosjektet involvera folk på tvers av alder, bakgrunn og interesser, og det skal mobilisera til dugnad. Etter forprosjektet er det mogleg å søkja om eit hovudprosjekt for å halda fram arbeidet. Det kan utløysa eit tilskot på 300.000 kroner over tre år.