Får éin million til snøkanonar
Ynsket var i 2019 seks millionar kroner. I fyrste omgang vert ein sjettedel av denne summen løyvd.
Det er styret for vekst- og strategifondet i Ullensvang kommune som nyleg har vedteke løyvinga, som er i tråd med søknaden kommunen mottok i juli. Pengane går til Folgefonna Snow AS, eit selskap som er under etablering og skal eigast av Visitfonna AS. Selskapet skal kjøpa snøkanonar for å betra snøtilhøva ved sommarskisenteret i Jondal.
Kanonane vil bidra til at Jondal framleis kan vera den mest openberre innfallsporten til fonna og eit reisemål for dei som likar å stå på ski, heiter det i saksutgreiinga.
Målet med kanonane er både å laga snø til å sikra lange sesongar og sikra eit lok av snø over breen som hindrar smelting, og å byggja ny is på breen.
Åtte millionar i alt
Tiltaket er kostnadsrekna til åtte millionar kroner pluss moms, medrekna prosjektering. Summen skal vera basert på pristilbod.
Den førebelse finansieringsplanen inneber aksjekapitalinnskot frå eigaren på éin million kroner, tilskot frå fylkeskommunen på éin million kroner, sponsorstønad på éin million kroner og lån eller anna finansiering på fire millionar kroner.
Rådmannen slår fast at aktivitet i skisenteret gagnar heile regionen.
— Det er ingen garantiar for at snøkanonar kan avhjelpa situasjonen i eit 50—100-årsperspektiv, men det er klare prognosar på at snøen vil vera borte i området om 20 år om det ikkje vert gjort noko. Med dette vil det truleg vera meir å tapa ved å ikkje gjera noko, skriv rådmannen, som støttar seg på ei fråsegn frå geolog og professor Jostein Bakke.
Han meiner at både kanonar og flytting av snø vil verta turvande. Det er på tide å ta ei avgjerd om kommunal deltaking og koma i gang i felten, meiner rådmannen. Etter hans syn vil løyvinga vera eit sterkt signal til andre bidragsytarar.
Sa nei
Kommunestyret i Jondal avslo i 2019 ein søknad om seks millionar kroner i stønad til prosjektet, men bad ordføraren ta initiativ til eit møte mellom søkjaren og kommunen om finansiering. Sidan har det vore fleire møte mellom partane om saka, ifylgje sakspapira til fondsstyret
Eit av vilkåra for løyvinga er at ho vert utbetala som såkalla bagatellmessig stønad, og at ingenting vert utbetala før tiltaket er fullfinansiert.
I sakspapira til kommunestyret i 2019 vart det opplyst at føretak berre kan få inntil 200.000 euro i bagatellmessig stønad over tre år, om ikkje ESA skal måtta godkjenna løyvinga. I 2018 fekk Visitfonna AS 1,7 millionar kroner frå næringsfondet i Jondal.
Les også:
