Får dei fyrste vaksinedosane over nyttår

Kommuneoverlege Dag Erlend Skjelbreid i Kvam herad seier at ein vil få tilsendt nokre få dosar koronavaksine den fyrste veka i januar. Då vil ein straks byrja vaksinera pasientar på sjukeheimane. Planen er å fylgja dei nasjonale retningslinene og den prioriteringslista som FHI har laga. Grunngjevinga er at det ofte er dei eldste og sjukaste som vil tola infeksjonen dårlegast.

Skjelbreid veit enno ikkje kor mange dosar Kvam vil få, men at ein vil få faste leveransar kvar veke. Ifølgje Bergens Tidende får Kvam 35 og Ullensvang 40 dosar i fyrste omgang.

Informerer etter kvart

Kommunen vil koma med meir informasjon om vaksinasjonen over nyttår, når ein veit meir konkret om korleis leveringane vil verta.

Det er Pfizer/BioNTech-vaksinen som kjem. Det er den fyrste som er godkjend og den fyrste ein vil senda ut.

Biverknadene er generelt milde og liknar dei ein kan få ved ein influensavaksine.

Sjukepleiarane på sjukeheimane vil vaksinera pasientane i samråd med sjukeheimslegane.

– Fylkesmannen sette fristen til i dag for å seia om me er klare til å ta mot dei fyrste vaksinedosane, seier Skjelbreid.

– Og det er de?

– Ja, det er me. Me veit at når me får Pfizer/BioNTech vaksinen, så har me fire–fem døgn på oss til å bruka han, seier Skjelbreid.

Kjem frosen

Vaksinen vil verta levert frosen til sjukehusapoteka. Når dei sender han ut til kommunane, vert dosane tina og skal halda kjøleskapstemperatur. Helseføretaka får vaksinane i større kvanta og skal pakka dei opp og fordela dei ut til kommunane. For Kvam sin del tek ein mot vaksinane frå Bergen.

Også i Ullensvang varslar kommunen at ein vil setja i gang med vaksinering av prioriterte grupper tidleg i det nye året. Vaksinane vert sette i Tyssohallen, men personar som bur på institusjon eller i omsorgsbustad med heildøgns pleie, vil få tilbod om å ta vaksinen der. Nokre med vedtak om helsetenester i heimen vil få tilbod om å ta vaksinen der, opplyser kommunen.

Informasjon med tilbod om vaksine er send ut i brev eller e-post til alle innbyggjarar i kommunen som er 65 år eller eldre i fyrste halvdel av 2021. Kommunen treng innan 6. januar tilbakemelding på om ein ynskjer vaksinasjon.

Vaksinen vert gjeven i to dosar. Andre dose skal setjast tre veker etter den fyrste dosen.