Får byggja nytt stølshus på Grønrimb
Olav-Magnus Hammer og Ingvild K. Skogseth har fått løyve til å riva og erstatta det gamle stølshuset på Kysnesstølen.
Selet som skal rivast på Grønrimb, er frå 1950-talet og har eit utbygt areal på 20 rutemeter. Det nye får eit areal på nær 36 rutemeter.
Fylkeskommunen har kome med ein «fyldig uttale», slår rådmannen fast i saksutgreiinga. I fråsegna heiter det at kulturmiljøet på stølen med er særeige og karakteristisk av di dei 16 bygga ligg på ein rygg i terrenget, noko som gjev høg «opplevingsverdi».
Vidare vert det påpeika mellom anna at dei planlagde, skråe vindaugo i dørene er framandelement, at grunnmuren bør vera av naturstein og ikkje betong, og at material- og fargevalet bør vera av det tradisjonelle slaget. Fylkeskommunen ser ingen gode argument for å riva det gamle selet, så aller helst bør ein i staden utbetra det. Uansett må det gamle bygget dokumenterast godt før rivinga, ifylgje fråsegna.
Rådmannen rår søkjarane til å retta seg etter innspela, men stiller ikkje noko vilkår om det i vedtaket om godkjenning. Stølen er eit spesielt miljø av di alle stølshusa er plasserte på ei rekkje, men stølen er ikkje omtala i kommuneplanen for Jondal som eit særskilt kulturmiljø.
Ettersom søkjarane har storfe, kan dei utan å søkja om dispensasjon gjera tiltak på stølen som er naudsynte for «stadbunden næring».
Hammer opplyser til HF at han truleg set i gang arbeidet i mai. Han har søkt om løyve til å nytta helikoptertransport.
