Fann «raude elvar» i Kvam og Jondal

Norsk institutt for naturforsking (NINA) og Havforskningsinstituttet (HI) har undersøkt 250 ville laksebestandar for å sjå om gena til villfisken har vorte påverka av rømt oppdrettslaks.

I ein rapport om arbeidet som vart publisert i desember, kjem det fram at forskarane har undersøkt 12 vassdrag i produksjonsområde 3, som er området frå Karmøy til Sotra. Hardanger ligg i produksjonsområde 3.

Heile 10 av dei 12 elvane vart klassifiserte som raude, det vil seia at gena til villaksen i stor grad var påverka av oppdrettslaks. Berre eitt vassdrag var grønt og såleis utan påverknad. I det siste vassdraget fann ein moderat påverknad.

To elvar i Kvam og éi elv i Jondal vart undersøkte. Steinsdalselva og Jondalselva fekk raud status. Forskarane undersøkte også Øysteseelva, men manglande data gjorde at forskarane ikkje kunne konkludera.

Av dei 250 bestandane som vart undersøkte, fann forskarane ingen genetisk påverknad i 32,8 prosent, svak påverknad i 28 prosent, moderat påverknad i 8,4 prosent og stor påverknad i 30,8 prosent.

Men er det eigentleg så farleg med litt blanda gen? Kjetil Hindar, ein av forfattarane av rapporten, seier til NRK at villaksen har mange trugsmål.

– At den vert genetisk dårlegare tilpassa, er med på å gjera situasjonen verre. Over tid vil det føra til færre laks, seier han.