Fann omkomen i leiteaksjon
Eit mannskap på over 60 personar søkte fredag kveld etter ein sakna person i Øystese. Personen vart funnen død natt til laurdag.
Vest politidistrikt opplyste klokka 19.15 fredag at politiet og Hovudredningssentralen hadde sett i verk ein leiteaksjon i Øystese. I tillegg til politiet var redningshelikopter og mannskap frå Norsk Folkehjelp, Raudekrossen og Norske Redningshunder kalla ut.
Like før klokka 01.00 melde politiet at søket var avslutta og at ein person var funnen omkomen.
Pårørande er varsla. Det er ikkje mistanke om at noko straffbart har skjedd, opplyser politistasjonssjef Terje Sperrevik ved Kvam politistasjon måndag. Han ynskjer å rosa lokalsamfunnet, som klarte å stabla saman mykje folk på kort tid.
– Det var ein godt gjennomført aksjon med mange involverte, som alle gjorde ein god jobb. Eg vil gje ein stor takk til dei som var med på aksjonen, seier politistasjonssjefen.
Dei som stilte opp, vart debrifa sundag, opplyser han.
