Fann bil, men ingen førar
Ein personbil vart laurdag føremiddag funnen kollidert og forlaten på fylkesveg 79 ved Fyksesundbrua. Etter kvart dukka to involverte menn opp i området.
Bilen hadde moderate skadar framme etter eit ublidt møte med fjellveggen på sørsida av sundet, mellom brua og Stokkaland.
Ein tilfeldig forbipasserande varsla naudetatane om ulukka, fortel innsatsleiar og politioverbetjent Per Gunnar Thrane i Kvam, Samnanger og Tysnes politistasjonsdistrikt.
Bilen var altså tom. Thrane opplyser at det etter ulukka var uvisst kvar føraren og eventuelle passasjerar hadde gjort av seg, og kva tilstand dei var i.
Politiet og Kvam brann og redning var i gang med søk etter vedkomande då HF var på staden. Brannsjef Torleif Ones opplyste at det i søket mellom anna vart nytta eit infraraudt kamera som gjev utslag på kroppsvarme. Elles budde brannmannskapa seg på det verste og stilte mellom anna med tauredningsutstyr. Terrenget i området er nemleg svært bratt.
Eit par timar etter at meldinga kom klokka 09.57, fann politiet to menn i eit bygg i området. Det viste seg å vera føraren og passasjeren. Den eine har innrømt at han køyrde bilen, fortel Thrane. Han seier det vart teke blodprøve og oppretta sak.
Politiet mistenkjer køyring i rusa tilstand, køyring utan førarkort og køyring med falske kjennemerke på bilen. I tillegg kan mennene risikera straff for å ha stukke av frå ulukka utan å melda frå om henne, noko som altså utløyste ein leiteaksjon.
Thrane opplyser at politiet fekk tips om bilen nyleg og såleis har vore klar over at sjåføren har disponert køyretøyet med falske kjennemerke. Etterforskinga dreia seg difor raskt om å finna denne personen.
Politiet og Kvam brann og redning rykte ut litt etter klokka 10. Også brannmannskap frå Ålvik kom til staden. Brannmannskapa hjelpte til mellom anna med å dirigera trafikken forbi ulukkesstaden. Bilen stod berre delvis i det eine køyrefeltet og var ikkje mykje til hinder.
