Færre ryper felte av småviltjegerar
149.000 ryper vart felte av småviltjegerar i jaktåret 2019/2020. Det er ein tilbakegang på 18 prosent frå førre jaktår, viser tal frå SSB.
Ein må heilt tilbake til 2012/2013 for å finne lågare tal, og det var òg 7 prosent færre småviltjegerar som jakta sist jaktår samanlikna med det førre, viser tal frå Statistisk sentralbyrå (SSB).
Talet på jegerar som drog på rypejakt gjekk ned med 10 prosent, og det var til saman 43.000 rypejegerar på ein eller fleire jaktturar i løpet av jaktåret.
Nedgangen kan komme av at det er innført store avgrensingar på kor mykje jegerane får skyte fleire stader. I tillegg er nokre område òg freda, på grunn av den store tilbakegangen i rypebestandane dei siste tiåra.
Talet på hjorteviltjegerar hadde ein liten auke, og til saman 92.000 jegerar deltok på jakt. Her var det flest, 60.000, som jakta elg.
Tilbakegangen i talet på jegerar gjeld likevel berre menn. Blant kvinner var det ein liten auke samanlikna med førre jaktår. Av dei til saman 135.700 jegerar som var jakt, var 8 prosent kvinner. Det utgjer i alt 10.800 kvinnelege jegerar, som er ein auke på rundt 300 frå året før.
(©NPK)
