Færre overnatta i Kvam
Talet på overnattingsgjester i Ullensvang har auka. I Kvam har det truleg vore ein nedgang.
Det fortel Andreas Skogseth, administrerande direktør i den regionale marknadsføringsaktøren Visit Hardangerfjord AS. Han baserer tala på statistikk frå Statistisk sentralbyrå (SSB).
Tala syner at om ein tek med alle typar overnattingstilbydarar, var det frå januar til og med juli i 2022 50.322 registrerte overnattingar. I same periode i 2023 er talet 44.233. Det gjev ein nedgang på 12,1 prosent. Skogseth er usikker på kva nedgangen skuldast.
Kommunane Kvam, Ulvik, Eidfjord og Ullensvang vert av SSB definerte som region Hardangerfjord. Statistikk frå byrået syner 360.682 overnattingar dei sju første månadene av 2023. Det gjev ein oppgang på 4,2 prosent samanlikna med 2022.
Auken har vore størst om sommaren.
– Sjølv om det har vore ein generell auke, har auken først og fremst kome i sommarmånadene. For dei andre månadene var det faktisk betre tal før pandemien, fortel Skogseth.
Utlendingane aukar mest
Nordmenn stod for 54 prosent av overnattingane i Hardanger i 2023. Likevel kan regionen takka utlendingane for oppgangen. Ifølgje Skogseth har om lag 3 prosent færre nordmenn overnatta i regionen, medan talet på utlendingar har auka med 14 prosent.
Ullensvang er hardangerkommunen med størst vekst så langt i 2023. I dei sju første månadene var det 8,6 prosent fleire overnattingar enn i same periode i fjor.
– Eg trur det skuldast at Ullensvang lenge har vore den mest kjende destinasjonen blant utlendingane. Når talet på utlendingar aukar, er det positivt for Ullensvang, seier Skogseth.
Om ein berre ser på juli, syner statistikken at færre nordmenn overnatta på hotell, medan fleire overnatta på campingplassar og i hyttegrender. Skogseth trur dette skuldast inflasjon og høge renter.
– Folk vel truleg rimelegare overnatting når tidene er usikre, seier han.
Blant utlendingane har talet på hotellovernattingar auka kraftig.
– Den svake krona gjer at det for utlendingar er ganske rimeleg å overnatta på hotell i Noreg, seier Skogseth.
Saknar framleis asiatane
Før koronaviruset var Asia ein viktig marknad for Hardanger. I 2022 og 2023 har det knapt vore ein asiatisk turist å sjå.
– Asiatane har ikkje kome attende etter pandemien. Det betyr at me kan takka europearar og amerikanarar for auken i talet på utanlandske turistar. Til dømes har me sett ei svært positiv utvikling frå land som Frankrike, Italia og Spania, fortel Skogseth.
Sjølv om inflasjon og høge renter påverkar økonomien til både norske og utanlandske reisande, har Skogseth tru på ei positiv utvikling i 2024.
– Dei utanlandske turoperatørane melder om stor interesse for Hardanger. Asiatiske reiselivsaktørar fortel at ting er i ferd med å normalisera seg. Eg trur Asia vil nærma seg gamalt nivå i 2024, og at veksten i regionen vil halda fram, seier han.
