Færre nye uføre i pandemiåret 2020
Sjølv om andelen nye uføre gjekk ned i fjor, er andelen uføre totalt framleis aukande. Nedgangen i nye uføre kjem av tiltak i samband med koronapandemien.
I alt 370.000 personar var uføretrygda i 2020 og busette ved utgangen av året. Det er vel 6.000 fleire enn året før. I tillegg var 11.900 personar uføre, men ikkje busette, viser tal frå Statistisk sentralbyrå (SSB).
Tala viser at 10,6 prosent av dei mellom 18 og 67 år var uføretrygda i 2020.
Gjennom året kom det til 28.500 nye uføre, og 27.500 var busette ved utgangen av året. Ikkje sidan 2016 har talet på nye uføre vore så lågt.
Forklaringa på dette er at mange uføre kjem frå AAP (arbeidsavklaringspengar), men på grunn av koronapandemien fekk dei som nærma seg slutten av AAP-perioden, forlengd støtteperioden. Dermed gjekk også færre over til uføretrygd, ifølgje SSB.
I tillegg var talet på nye uføre i 2018 og 2019 mykje høgare enn i åra før.
I tillegg viser statistikken òg at andelen uføre som kombinerte uføretrygda med arbeid, fall i 2020. Dette har igjen samanheng med at koronatiltaka gjorde det vanskelegare å komme ut i arbeidslivet.
(©NPK)
