Færre blir bøtelagt for mobilbruk: – Høge bøter verkar avskrekkande

Fleire bilistar legg frå seg mobilen når dei køyrer. I 2024 fekk 5838 førare bot for mobilbruk. Det er rundt 700 færre enn året før og nesten ei halvering frå 2022.

Det viser tal P4-nyheitene har fått frå Utrykkingspolitiet (UP).

Det har vorte svært dyrt å bli teken for mobilbruk bak rattet. I 2021 var bota på 1700 kroner, medan i dag må du ut med 10.200 kroner.

– Vi er veldig fornøgde med utviklinga og ser ei stor forbetring på dette området, seier UP-sjef Knut Smedsrud.

Nordmenn betalte til saman nesten 60 millionar kroner i mobilbøter i 2024. UP-sjefen meiner merksemda rundt dei auka bøtesatsane har fått fleire til å la mobilen liggje når dei køyrer.

– Også er 10.200 kroner eit høgt beløp, sjølvsagt verkar det avskrekkande, seier Smedsrud, som ikkje har noko ønske om endå høgare bøter.

– Vi meiner vel at det nivået det ligg på no, er høgt nok. Det er noko med at det skal vere forholdsmessig til andre lovbrot òg, seier Smedsrud.

UP kontrollerte i fjor godt over 30.000 førarar. Ifølgje Smedsrud brukte 2,4 prosent av dei mobilen bak rattet. Dei aller fleste som blir stansa, sit med mobilen i handa og skrollar, tekstar eller les.

(©NPK)