Færre arbeidsledige

Ifølgje nye tal frå Nav var 38 personar utan arbeid førre månad. Det er 7 færre enn i fjor, noko som svarar til 0,9 prosent av arbeidsstyrken. I tillegg er 22 personar registrerte som delvis arbeidsledige, 11 færre enn i fjor.

I Ullensvang var 46 personar eller 0,8 prosent heilt arbeidsledige. Det er 3 fleire enn same tid i fjor, ein auke på 7 prosent. 28 personar er delvis ledige, 2 færre enn august i fjor.

1,8 prosent av arbeidsstyrken i Vestland er registrert som heilt arbeidsledige. Det vil seia at 6.165 personar stod utan arbeid i august, noko som er 447 fleire enn same tid i fjor. Landssnittet for heilt arbeidsledige er på 2 prosent. Det er ein auke på 12 prosent.

I Kvam var det 28 registrerte ledige stillingar i førre månad, medan det i Ullensvang var 53. Totalt i fylket var det 3.406 registrerte ledige stillingar.

Ifylgje ei pressemelding frå Nav er det framleis låg arbeidsløyse i Vestland, men tala syner ikkje heile biletet om arbeidskraftreservar. I fjor sto nær 72.000 innbyggjarar i Vestland mellom 20 og 66 år utanfor arbeidsmarknaden, viser dei nye tala. Tala omfattar alle som korkje har arbeid eller er sjølvstendig næringsdrivande, tek høgare utdanning eller har gått av med pensjon.

I Kvam stod 904 personar stod utanfor arbeidsmarknaden i fjor. Det svarar til 19,5 prosent av den totale arbeidsstyrken i heradet. I Ullensvang var 1.057 personar utanfor, noko som svarar til 16,8 prosent.

Bjarte Hysing-Olsen, fylkesdirektør i Nav Vestland, seier at det sjølvsagt ikkje er bra at talet på personar «i utanforskap» stig. Han meiner at den gode arbeidsmarknaden legg til rette for at arbeidsgjevarar kan inkludera fleire av dei som ynskjer å jobba.

– For å bevara velferdssamfunnet, er me avhengige av at alle som kan og vil jobba, får moglegheita til det. Utanforskap må sjåast på som ein arbeidskraftreserve og ressurs. Då må arbeidsgjevarar senka krava eller vera meir fleksible, seier Hysing-Olsen.