– Få skadar, men mange varer
Palmehelga vart både roleg og travel for hjelpekorpsa i Kvam.
– Me har rykt ut ein gong. Det var til ein brotskade i området ved Breiarusta på palmesundag, fortel leiar i Norheimsund Røde Kors Hjelpekorps, Kjersti Neteland.
Likevel omtalar ho helga som travel, ettersom laget brukte mykje tid på å køyra varer til hytter på Kvamskogen.
– Fredag køyrde me varer i ni timar og laurdag i 12 timar, fortel ho.
– Palmehelga var roleg og fin, fortel Alida Constanse Fonneland, leiar i Øystese Røde Kors Hjelpekorps.
Sjølv om medlemene i korpset slapp å rykkja ut, brukte også dei mykje tid på varekøyring.
Hjelpekorpset i Norheimsund samarbeider med Bergen Røde Kors Hjelpekorps og Arna og Åsane Røde Kors Hjelpekorps. Alle tre har hytter på Kvamskogen.
– Til saman har me mellom 15 og 20 personar på vakt på Kvamskogen i heile påsken, fortel Neteland.
Hjelpekorpsa i Norheimsund og Arna og Åsane samarbeider også om eit arrangement i Mormorbakken i nærleiken av Kvamskogen Landhandleri langfredag. Hjelpekorpsa stiller med bålpanne og lovar gratis pølser, saft og bakst.
Fonneland fortel at Øystese-korpset til alle tider kjem til å ha tre til seks personar på vakt i hytta i Hamlagrø i påsken.
Fonneland og Neteland er samde om at vêret betyr mykje for resten av høgtida.
– Jo finare vêr, jo travlare vert det, seier Neteland.
– Når det er fint vêr, vert det meir aktivitet i fjellet. Det betyr gjerne at det vert meir å gjera. Eg vil oppmoda alle om å vera forsiktige, seier Fonneland.
