Eventyrleg sommar i marinaen

Lukta av solkrem, pizza, saltvatn, saman med lyden av plask, prat og badande born, gjev assosiasjonar til langt sørlegare strøk enn Hardangerfjorden. Alle gjesteplassane i Strandebarm Marina var opptekne då HF vitja hamna ein varm sommardag, slik dei også hadde vore i fleire dagar. Fleire båtar hadde måtta reisa til båthamna i Bakka, og nokre hadde lagt til ved Svanholm, ein holme like utanfor marinaen.

Kombinasjonen med båthamna, kafeen, aktivitetstilbodet og området rundt gjer båthamna spesiell, trur Sletvold.

— Det er totalløysinga som gjer at dette vert ein suksess, seier Sletvold, som er ei av eldsjelene bak anlegget.

Sjå bilete frå anlegget her:

Stor dugnadsinnsats

Dei første stega mot denne totalløysinga vart tekne for mange år sidan. Då reguleringsplanen som opna for båthamn og sjøaktivitetssenter vart godkjend i heradsstyret i 2013, hadde planlegginga og førearbeidet allereie vore i gang i sju år. Båthamna vart bygd og området opparbeidd med sitjeplassar, scene og sandstrand.

I 2018 sa Trond Mohn seg villig til å bidra til finansieringa av sjøaktivitetssenteret. Sletvold og Asbjørn Sangolt fann straks fram teiknebrettet og sette i gang arbeidet med utforminga.

— Asbjørn har dei gode ideane om korleis ting skal sjå ut. Eg gjer berre reinteikningsjobben og det formelle arbeidet med mellom anna søknader til kommunen.

Saman har Sletvold og Sangolt leia prosjektet.

Leidulv Brattli AS fekk jobben hovudentreprenør, medan Bromle Maskin AS frå Øystese har bidrege med mellom anna muring av kaifront og sprengingsarbeid. Då sjølve tomta var klar, byrja dugnadsarbeidet. Det starta med forskaling av betongkant i forkant av bygget for to år sidan. Før sommaren i år vart ferdigattesten for bygget i boks.

I mellomtida er alt byggingsarbeid, inkludert røyrlegging og ventilasjon, både innvendig og utvendig, gjort på dugnad. Over førti personar har vore med, medan mellom fem og ti har bidrege mest, fortel Sletvold.

— Asbjørn Sangolt har gjort desidert mest og har sikkert åleine jobba eit årsverk her. Til saman er det mange som har bidrege. Det er det totale talet timar og personar som er avgjerande for suksessen, seier han.

Les også:

Husar mat, sørvis og aktivitet

Sjøaktivitetssenteret inneheld sørvisanlegg med vaskemaskin, tørketrommel, dusjar og toalett. I tillegg husar det den nyopna kafeen utleige av sjøsportsutstyr som SUP-brett, kanoar og kajakkar. Både kafeen og utleiga er nye av året og vert drive av Sjøaktiv Strandebarm i Strandebarm Idrettslag.

Ideen om sommarkafé i bygget kom frå Øyvind Fredheim allereie då bygginga starta for snart to år sidan, fortel Sletvold. Då bygget i år stod ferdig, starta jobben med å starta kafé. Pizzaomn vart kjøpt inn, og folk vart tilsette for å driva kafeen. Til saman har 11 jobb med å servera sommargjestene.

— Mange har dette som sin første jobb. Det er veldig kjekt å kunna bidra til at så mange får seg sommarjobb, seier Sletvold.

To av dei tilsette i kafeen er Marthe Eide (16) og Hanne Vik Rye (15). Eide bur i Tørvikbygd, medan Rye kjem frå Bergen og har hytte i Strandebarm.

— Det har vore veldig kjekt å jobba her på ein så fin stad. For meg som berre har hytte her, har det også vore ei fin moglegheit til å møta nye menneske eg kan verta kjend med. Det er veldig hyggjelege folk her, og me har eit godt arbeidsmiljø, fortel Rye.

Pågangen i kafeen har vore stor, fortel jentene. Dei trur ordet har spreidd seg i båtmiljøet, og at fleire får høyra om hamna gjennom andre som har vore her.

— Me får veldig gode tilbakemeldingar. Mange kjem til oss og fortel at dette er den finaste båthamna dei har vore i, seier Eide.

— Me får daglege tilbakemeldingar frå folk som seier akkurat det, seier Rye.

Les også:

— Kjem til å få ringverknader

Fint vêr tidleg på sommaren gjorde at salet eksploderte, fortel Sletvold. I løpet av dei 13 første dagane var omsetnaden 118.000 kroner. Fryseboksen full av is vart raskt tom, og berre to dagar etter han vart fylt att, måtte det igjen kjøpast inn nytt.

— Me har selt mykje meir enn me hadde sett for oss.

Ifølgje Sletvold vitjar mange lokale området på grunn av både bading og kafeen, i tillegg til alle båtgjestene.

— Tilbakemeldingane har vore utelukkande positive. Eg kan ikkje koma på ein einaste negativ, seier Sletvold.

Også han fortel om båtfolk som skryter.

— Eit eldre par som vitja hamna, hadde feriert i båt langs heile noregskysten i over tretti år. Dei fortalde at dei aldri hadde opplevd å koma til ein så flott stad som dette. Det er klart at det er god reklame for hamna når folk som sit att med slike inntrykk, spreier dette vidare til sine vener og kjente.

Sletvold trur mange som aldri hadde høyrt om Strandebarm før, no har vorte kjende med staden på grunn av marinaen.

— Eg er overtydd om at dette kjem til å få ringverknader for bygda. Folk får positive opplevingar og gode minne frå Strandebarm. Det har også effekt på andre ting.

Vil utvikla bygda

Ein overordna mål er at bygda skal utvikla seg, fortel Sletvold.

— Me ser at stadig fleire unge flyttar heim att, og eg er overtydd om at anlegg som dette påverkar det. At Strandebarm er ein attraktiv fritidsplass, er også avgjerande for at ein del serviceinstitusjonar overlever. Slikt er grunnleggjande for eksistensen til Bygde-Noreg.

Ringverknadane viser mellom anna att i ein kraftig oppsving innmeldingar i idrettslaget. Dagleg registrerer fleire familiar seg som medlemmar. Mange av dei kjem frå andre stadar enn Strandebarm. Når dei er medlemmar i idrettslaget, får dei disponera sjøsportsutstyret fritt.

Området rundt marinaen er enno ikkje ferdigutvikla, ifølgje Sletvold. Sangolt arbeider i sommar med ein ny gangsti ned mot sjøen, som ein avstikkar frå Kyststamvegen. I skogområdet ved marinaen og idrettsbana er arbeidet med minigolfbane i gang. Sjølve båthamna skal også utvidast med ei ny bryggje. Den er éin meter breiare og 60 centimeter djupare enn bryggja som er, og skal fungera som ein molo for å sikra hamna betre mot austavind. Den nye bryggja skal også fungera som gjestehamn, og vil gje fleire gjesteplassar til hamna.

— Eg har tru på at det kjem til å verta mykje liv og røre her i åra som kjem, seier Sletvold.