– Etterlever ikkje regelverket
Statsforvaltaren i Vestland refsar Ullensvang kommune etter tilsyn.
Opplæringslova seier at elevar som ikkje har eller som ikkje kan få tilfredsstillande utbyte av det ordinære opplæringstilbodet, har rett til spesialundervisning. Før kommunen eller fylkeskommunen gjer vedtak om spesialundervisning, skal det liggja føre ei sakkunnig vurdering av dei særlege behova til eleven. Tilsynet galdt praksisen for å utarbeida denne vurderinga.
– Me har funne at de ikkje etterlever regelverket på alle område, skriv Statsforvaltaren i rapporten som vart levert 5. januar.
Statsforvaltaren meiner at kommunen bryt både forvaltingslova, opplæringslova og barnekonvensjonen.
Brota på forvaltingslova handlar om at kommunen ikkje førebur og avgjer saker utan ugrunna opphald, og ikkje ser til at saka er så godt opplyst som mogleg før det vert gjort vedtak. Dessutan må kommunen sjå til at mindreårige partar får moglegheit til å gje uttrykk for sitt syn, og vektleggja det i samsvar med alder og mogenskap.
Når det gjeld den sakkunnige vurderinga, skal kommunen etter lova greia ut og ta standpunkt til mellom anna eleven sitt utbyte av det ordinære opplæringstilbodet, lærevanskar hjå eleven og andre særlege forhold som er viktige for opplæringa. Det meiner Statsforvaltaren ikkje vert gjort i Ullensvang.
Statsforvaltaren meiner dessutan at kommunen ikkje tek omsyn til barnets beste. Ifylgje barnekonvensjonen skal barnets beste vera eit grunnleggjande omsyn i alle handlingar som råkar born.
Ullensvang kommune må setja i verk tiltak for å rette brota så snart som råd. Når pålegga er retta, lyt kommunen melda tilbake til Statsforvaltaren. Fristen er 3. mai 2024.
