– Erklærer mistillit
Fleire lokallag i Vestland Industri- og Næringsparti (INP) har erklært mistillit mot partileiinga sentralt.
Det kjem fram i ei pressemelding frå Vestland INP 11. oktober. Mistilliten er retta mot partileiinga, inkludert partileiar, nestleiarar og resten av medlemene i sentralstyret, som har vore ansvarleg for prosessen og handteringa av saka mot styret i Vestland INP.
Sentralstyret vedtok i september å løysa opp fylkesstyret og å ekskludera to medlemer. Bjarte Helland frå Kvam er ein av dei.
– Det vert snakka om maktkamp i INP, men eigentleg har det berre vore ein ukontrollert vestlandsvind som sentralstyret har vore nøydd til å få slutt på, skreiv 1. nestleiar, Øistein Høksnes i ei pressemelding etter sentralstyremøtet.
Lokallaga meiner at sentralstyret og landsstyret ikkje har handla i tråd med god forvaltingsskikk eller partiet sine vedtekter i saka. Det ligg ikkje føre tilstrekkeleg sakleg grunnlag for handlingane, som kan støttast av juridiske tolkingar, meiner lokallaga. Dei ser på prosessen med å ta frå to tillitsvalde medlemskapet og å leggja ned fylkeslaget sitt styre, som svært mangelfull og prega av hastverk.
Sentralstyret har vist manglande dømmekraft og leiing, som igjen har bidrege til å skada partiet og omdømet til fleire partimedlemer og deira familiar, meiner lokallaga. Dei ber landsstyret om å handsama saka som eit mistillitsframlegg.
Fylgjande lokallag har skrive under på framlegget: Alver, Austrheim, Austevoll, Bremanger, Bømlo, Etne, Fitjar, Høyanger, Kinn, Kvam, Stad, Sunnfjord, Sveio, Tysnes, Ullensvang, Vestland og Stord.
Frå sentralt hald er tonen ein annan. Sentralstyret hevdar at dei har handsama saker mellom anna om varslingar, brot på vedtekter, bekymringsmeldingar, oppleving av manglande vilje til samarbeid, trugsmål mot enkeltpersonar i sentralstyret og offentleg handling med ynske om å skada omdømet til partiet, for å nemna noko.
– INP tek, uten opphald, alle naudsynte grep for å byggja partiet, verdiane og organisasjonen vidare med alle våre dyktige og partilojale medlemer på ein demokratisk og god måte, skriv partileiar Ann Jorun Hillersøy i ei pressemelding om interimstyret i Vestland INP 11. oktober.
