– Er meir til gagn enn skade
Statnett SF ynskjer ikkje å flytta traseen for 420-kilovoltsleidningen vest for Bjølsgrøvatnet i tråd med ynske frå grunneigarar.
Føretaket har notert seg at grunneigarane i Tjørnadalane er kritiske til traseen som det er søkt konsesjon for. Dei meiner den lanserte traseen for ein del av leidningen frå Simadal til Samnanger medfører ulemper for dei og andre som nyttar området.
Selskapet meiner grunnlaget for framlegget om endra trasé er godt, og at omlegginga vil gje monaleg redusert risiko for gjentekne utfall. Det kjem fram i eit brev frå Statnett til Noregs vassdrags- og energidirektorat. Brevet er eit svar på ein handfull høyringsinnspel til konsesjonssøknaden.
– Statnett meiner difor at dei omsøkte tiltaka «tvillaust er meir til gagn enn skade», sjølv om traseen medfører ulemper for fritidsinteressene i Tjørnadalane. Grunnlaget er der for å gje oreigningsløyve for dei naudsynte rettane som er skildra i konsesjonssøknaden, skriv selskapet.
Statnett påpeikar at føretaket har hatt jamleg kontakt med representantar for dei to råka sameigene. Desse har fått tilbod om ein minneleg avtale om tiltreding og erstatningsoppgjer. Så langt skal dei fleste partane ha avvist dette. For å sikra framdrift i prosjektet, meiner Statnett at det kan vera naudsynt med oreigningsløyve i tilfelle der ein ikkje oppnår minnelege avtalar.
Vil fly i hekketid
Statnett ynskjer å fly med helikopter i spel- og hekkeperioden når kraftlina skal flyttast. Selskapet påpeikar i svaret på høyringsfråsegna frå Statsforvaltaren i Vestland at ei føring om at det ikkje må flygast i spel- og hekkeperioden – frå april til juni – vil auka risikoen for å ikkje rekkja den planlagde perioden med utkopling av kraftlina frå Simadal til Samnanger.
Statnett planlegg å fullføra anleggsarbeidet i løpet av to–tre sesongar. Arbeidet vil hovudsakleg verta utført med helikopter. Dei utfordrande vêrtilhøva i området gjer det vanskeleg, om ikkje umogleg, å planleggja flyging, og Statnett er dimed avhengig av å ha fleksibilitet for å ferdigstilla planlagde tiltak i tide. Planlegging av utkoplingar er krevjande, ifylgje verksemda.
Når det gjeld verknader for skogsfugl, hevdar Statnett at tiurleiken i Granvin kom attende etter eit par års opphald som fylgje av helikoptertrafikk i samband med bygginga av Sima–Samnanger-leidningen.
Til eit innspel frå Kvam herad om bruk av omsøkte anleggsplassar 4 og 5 ved Kåskjer svarar Statnett at det vert planlagt å nytta plassane til premontering og helikopterplassar. Det inneber at det vil vera ein god del flyging frå områda medan anleggsarbeidet går føre seg.
I dialog med Statkraft
Arealet ved den aktuelle anleggsplassen ved enden av Damvegen er i dag for lite til å kunna brukast til premontering av master, men Statnett ynskjer å kunna bruka plassen til mellom anna helikopterparkering. Statnett er i dialog med Statkraft Energi AS om eventuell lenging av fjellvegen. Det vert vurdert å lengja han i samband med utbetring av hovuddammen i Bjølsegrøvatnet.
Verksemda vil vurdera om det kan vera mogleg å etablera ein anleggsplass i koordinasjon med planane til Statkraft Energi.
Statnett vil uansett halda på anleggsplassane ved Kåskjer. Planen er å nytta dei til premontering av master og landingsplassar. Samstundes ser selskapet på moglegheita for å oppretta ein anleggsplass ved Øystese knytt til premonteringa.
