– Er ikkje med i overordna plan

Tiltaket som er under regulering, er, slik det er skissert, ikkje med i nokon overordna arealplan i heradet. Det påpeikar forbundet i ein merknad til plankonsulent Archihus AS. Strandsona frå Saltvika og innover har gode natur- og friluftskvalitetar, meiner forbundet.

Naturvernforbundet meiner at det er uvanleg at eit politisk utval godkjenner oppstart av ein reguleringsplan i denne skalaen utan at han er vurdert i kommuneplanen.

Planen representerer eit stort og øydeleggjande inngrep i eit område med få og mindre inngrep, meiner forbundet. Området nær fjorden er omtrent det siste naturområdet nær Omastrand som har naturleg og opphavleg preg, påpeikar naturvernarane.

Ein bilveg til fjorden og ei stor utfylling vil i prinsippet fjerna dagens fjordlandskap, og eikeskogen og det meste av vegetasjonen vil forsvinna, meiner forbundet, som synest heradet burde ha avvist planinitiativet.

I overordna planar har naturen fått mykje høgare verdi dei siste åra, og Noreg har slutta seg til naturavtalen til FN, påpeikar forbundet. Kvar kommune har ansvar for å ta vare på naturen, og plan- og bygningslova er eit viktig verktøy. I den aktuelle saka kan det sjå ut til at politikarane i Kvam ikkje har fått det med seg, skriv forbundet, som tek til orde for å rullera kommuneplanen igjen.