– Er i strid med overordna plan

Det påpeikar leiar Klaus Rasmussen i Naturvernforbundet Hardanger i ein merknad til reguleringsarbeidet og planprogrammet for steinuttaket.

Miljø-, plan- og bygningsutvalet har godkjent at det vert sett i gang arbeid med detaljreguleringsplanen, på vilkår av at det vert utarbeidd planprogram og konsekvensutgreiing for tiltak som er i strid med kommuneplanen.

Planområdet på 85 dekar ligg sentralt nord på Ljones-halvøya, ifylgje planinitiativet. Utmarksområdet har knaus og mykje furuskog med gras og blåbær. Det er myr i randsona til reguleringsområdet. Utmarka har dei siste 30 åra ikkje vore i bruk som beite på grunn av låg bonitet og ein del skrentar og stup som gjer området ueigna til beite for storfe.

Området er i dag landbruks-, natur- og friluftsområde med omsynssone for natur, ifylgje Naturvernforbundet. Dette vert nemnt i søknaden og saksutgreiinga. Naturvernforbundet meiner at heradet har heimel til å avslå søknaden og utsetja planarbeidet. Statsforvaltaren i Vestland bør òg koma med sitt syn på eit omfattande planarbeid som er i strid med den overordna planen, meiner forbundet.

I saksutgreiinga vert det understreka at mineralførekomstar ikkje er grundig kartlagde i Kvam.

– Vil komande tunnelprosjekt påverka tilgangen på slikt råstoff? spør Rasmussen.

Heradet bør gå vidare med kommuneplanen før ein opnar for nye planar som ikkje er vurderte i eit overordna perspektiv, meiner Naturvernforbundet Hardanger.

Andre relaterte tema som treng oppdatering i kommuneplanen, ifylgje Naturvernforbundet, er nydyrking og skogbruk. Det er svært uheldig at Kvam herad ikkje har teke bryet med å samordna ein plan for skogsbilvegar med arealdelen til kommuneplanen, meiner forbundet.

Naturvernforbundet ynskjer at kommuneplanen sin arealdel vert teken opp til ny vurdering før ein går inn i enkeltsaker og prøver å regulera. Slike saker viser seg ofte å vera meir kompliserte og tidkrevjande når ein vil omgå kommuneplanen, skriv Rasmussen.