Er du glad i å spela sjakk?

Ona har lyst til å verta betre i sjakk og til å ha det som ein fritidsaktivitet. No er dei næraste klubbane på Voss og i Odda. Det er litt langt å reisa, tykkjer åtteåringen.

Det er far hennar, Cato Haaheim Kjosås, som har lært henne å spela sjakk. No lærer ho av sjakkbøker og sjakk-appar på telefonen.

— Kva er det du lærer?

— Litt av kvart, eigentleg. Eg lærer verdien til og oppstillinga til brikkene. Og så lærer eg mange ulike mattar. I tillegg er det ulike oppgåver eg kan løysa, og eg kan lesa om parti som har vorte spela tidlegare, fortel Ona.

— Kven vil du skal byrja i klubben?

— Eg håpar at det er nokon på min alder som vil spela med meg. Eg veit om ei i klassen som kunne tenkja seg å vera med, fortel ho.

Cato trur at alder ikkje har så mykje å seia. Han meiner ein femåring kan vera minst like god som ein niåring.

— Det beste hadde vore om det fanst ein vaksen person med sjakkinteresse som kunne ha vore med og starta opp. Ei eldsjel som kan litt om sjakk og som er interessert i å læra bort, seier han.

Litt er gjort allereie. Cato har snakka med Øystese Idrettslag, som viste interesse for å ha ein sjakklubb i laget. Også lokale er det tenkt på.

Ulikt alt anna

Det Ona tykkjer er kjekt med å spela sjakk, er at det er veldig ulikt alle andre spel. I tillegg likar ho at ein må bruka tid på å tenkja over kva ein skal gjera.

Spelinga føregår både heime og i friminutta på skulen. Då har ho med seg eit lite brett som får plass i lomma.

— Rekk de å spela ferdig i eit friminutt?

— Det spørst kven eg spelar mot. Ein gong vann eg etter fire trekk. Då rakk me det fint, fortel ho.

— Har du vunne over faren din?

— Eg hugsar godt ein gong me spela. Då hadde eg ein dronningbukk. Då gav pappen opp med ein gong, seier Ona.

Oldebesten har ho spela mot òg. Men han er for god for henne, fortel ho.

— Enn så lenge?

— Ja.

Eige språk

Når HF er innom i stova på Kjosås, vert det vist sjakk på tv, det står sjakkspel på stovebordet og sjakkboka er lagd fram.

— Eg ser på mest for å heia på Magnus Carlsen. Eg likar han veldig godt. No spelar han mot Nepomnjasjtsjij, fortel ho.

Så seier faren at ho skal finna ein gaffel. Ein familiegaffel.

— Det er dronning til D4, svarar Ona etter kort tid.

— Kva tenkjer du på når du startar eit spel?

— Veldig lenge har eg flytta E-bonden to hakk fram, og så flytta hesten på B til 3C. Då vernar eg bonden på E, fortel ho.

HF sin utsende skjønar diverre fint lite.

— Treng ikkje mange

Då sjakkentusiast Knut Steinar Bu i Folgefonn sjakklubb i Odda lærte å spela sjakk av far sin, var han åtte år gamal. I 2014 var han med på å starta den lokale sjakklubben. Folgefonn Sjakklubb har medlemer både frå Ullensvang og Kvinnherad.

Pandemien har lagt ein liten dempar på aktiviteten, men det er ein liten gjeng som treffest i Odda kvar veke.

— Kva er aldersspennet?

— Det er stort sett eldre som er med, men me har med oss ein 12-åring, seier Bu.

Han fortel at ein ikkje treng vera så mange. I Folgefonn Sjakklubb er det 13 medlemer. Klubben får låna gratis lokale av frivilligsentralen i Odda. Stundom har spelarane temakveldar der dei pratar om og øver seg på ulike opningar, til dømes.

— Få med nokon vaksne og dra det i gang! oppmodar Bu.