Energiverk får fleire eigarar

Haugaland Kraft AS (HK) har invitert med kommunane Fitjar, Bømlo, Etne og Sauda på eigarsida i selskapet til 0,2 prosent eigarskap kvar.

Dei har alle takka ja og vil vera eigarar i HK frå årsskiftet.

– HK har over lang tid hatt som strategi å vera ein pådrivar i utviklinga av regionen Sunnhordland, Hardanger, Indre Ryfylke og Haugalandet, seier konsernsjef Olav Linga i ei pressemelding.

Som eit ledd i strategien har selskapet dei siste åra integrert ei rekkje lokale elektrisitetsverk i konsernet mot at eigarane har fått oppgjer i form av aksjar i HK.

– Det inneber at fleire kommunar og lokalsamfunn, der me driv verksemda vår, har fått påverka strategien og måla til selskapet. Overskotet frå HK har gått tilbake til regionen og dei lokale eigarane. Det er viktig for oss, seier Linga.

HK skal bidra til det grøne skiftet i regionen, både med omsyn til elektrifiseriing, berekraft og ved å leggja til rette for nye, grøne industriarbeidsplassar.

Til dette treng selskapet regionale eigarar som ynskjer vekst og utvikling og som støttar arbeidet med å finna nye vekstmoglegheiter for konsernet, seier konsernsjefen.

Eigarane vil kunna påverka HK både når det gjeld arbeidsplassar, digitalisering, fiberutbygging, framtidsløysingar, nettutvikling og kraftproduksjon.

Ordførar Jarle Nilsen (Ap) i Karmøy kommune er den største eigaren i HK. Han peikar på at eigarutbytet er viktig for kommunane fordi det bidreg til gode kommunale tilbod til innbyggjarane og næringslivet.

– Det at me no får inn fleire nye kommunale eigarar, vil styrkja heile regionen mellom Boknafjorden og Bjørnafjorden for framtida, seier ordføraren.