Endrar rutene igjen

Måndag 27. april går Skyss tilbake til vanleg rutetilbod for buss i samband med at skulane vert delvis opna. Skuleskyssen for 1.–4. trinn og vidaregåande skular vert tilpassa, skriv Skyss i ei pressemelding.

Passasjerstatistikken viser at fire av fem reisande har unngått buss og bybane dei siste vekene. No aukar reisetala igjen.

– Med den gradvise opninga av samfunnet gjer fylkeskommunnen no alt me kan for å tilby kollektivtransport til dei som treng det, samstundes som me rettar oss etter pålegga frå Folkehelseinstituttet og kommunane om smittevern, seier fylkesordførar Jon Askeland (Sp).

Pålegget om å halda god avstand gjeld framleis, og smittevernreglane kan medføra at det ikkje er plass til alle reisande på bussane. Foreldre og føresette må følga med på dette, slik at ikkje elevar vert ståande att utan å komma seg på skulen. Nokre må kanskje køyra eller følga borna til skulen i starten, seier Askeland.

Skyss vil setta inn ekstrabussar i skuleskyssen så langt det lèt seg gjera, men fylkesordføraren ber om at skuleelevar reiser på andre måtar om det er mogleg.

Den nettbaserte reiseplanleggaren til Skyss vil vera oppdatert frå fredag 24. april.

Det vert ingen endringar for skyssbåt og ferje.